Namzedê Partîya Çep a Keske yê Amedî Azad Barişî operasyonê qirkerdişê sîyasîyî ANFyî rê ercnayî.

Barişî da zanayene ke nê operasyonî gama verêne ya konseptêkê pîlêrî ya û vat: ''Nê operasyonî normal nîyê. Weçînayîşan rê 20 rojî mendî û nê rojan de operasyono winayên nîşanê konseptêkê pîlêrî yo. Îqtîdar keno ke rêxistinîya partîye pûç bikero, verê çapemenîya azade bigêro û şarî bêagahîye war verdo, vengê roşnvîran û hunermendan bibirno û pê destbendkerdişê huqûqnasan zî asayîşê sindoqan bivisno mîyanê tehlukeyî. Îqtîdar nê operayonan rê do dewam bikero. Îqtîdar armanc keno ke pê nê operasyonan kurdan nêzdîyê îtîfaqê Miletî nêkero û eke îtîfaqê Miletî vengê xo nê operasyonan rê bikero zî ey krîmînalîze bikero. La xora ganî nameyê demokrasî ser o Îtîfaqê Miletî vera nê operasyonan vejîyo.

Ma venga şarê xo, rayaumîya dinya, çapemenîya welat û dinya danê ke vera nê operasyonan vengê xo berz bikerê. Ma heta nika verê tedayanê îqtîdarî de çok nêşîyê erdî ro û ma do nêşorê. Şarê ma rixmê her çî zî têkoşînê xo rê dewam keno. Ma do weçînayîşan de serkewtişêkê pîlî bivisnê destî. Şewa ke 14ê menge girê dana 15ê menga tede ma îqtîdarî bi xurtî bin bivisnê. Ê do binvistişî ra nêeşkê xo bixelisnê.''