Akademîsyena Zanîngehê Federalî yê Rio Grande do Solî yê Brezilya Florecia Guarche derheqê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de ANFyî rê qisey kerd.

Akademîsyene Florencia Guarche ard ziwann ke aye 2015 de têkoşînê azadîye yê kurdan şinasnayo û nika zanîngeh de paradîgmaya Abdullah Ocalanî ser o xebitîyena. Akademîsyene Florencia Guarche vat: ''Ocalanî cewabêko hol dayo persa 'ma kam ê.' Paradîgmaya Ocalanî zî seba ke neteweyêka demokratîke awan biba rayîrê raştî eşkera kena. Eke ma bizanê ma kam ê ma eşkenê sey komelanê cîyayan yew bibê û neteweyêka demokratîke awan bikerê. Ocalan firsend dano ke ma bêdewletbîyayîşî ser o bifikirê. Ocalan seba meseleyanê nikayênan metodê têkoşînê hemparî mojneno.''

Akademîsyene Florencia Guarche da zanayene ke mîyanê têgêrayîşê kurdan de tewr zaf têkoşînê cinîyan ê kurdan tesîrê ci kerdo û vat: ''Cinîyê kurdî seba mi rayîr û hêzê şorişî yê raşt ê. Têkoşînê cinîyan ê kurdan seba ma pêroyînan beno çimeyê îstîfadekerdişî. Abdullah Ocalanî zî zaf giranîye û girîngîye daya Şorişê Cinîyan ke no zî seba ma hêvîyêka pîl a.''

Akademîsyene Florencia Guarche bale ante Hemleya Azadîye ser û vat: ''Abdullah Ocalan çareserîya meseleya kurdan de aktorêko sereke yo. Seba çareserîye ganî hêverî dîyalogî ey reyde bêrê kerdene. Seba ke o aktorêko hende girîng o yeno tecrîdkerdene. Hemleya Azadîye zaf girîng a. Bi na hemleya globale merdimî eşkenê paradîgmaya Ocalanî nêzdî ra hîna zaf bişinasnê û rîyê Tirkîya yê raştikênî zî bivînê. Ganî enternasyonelî zî paştî bidê paradîgmaya Abdullah Ocalanî û komel na paradîgma nîqaş bikero. Na hemle kerd ke komelê dinya yê cîyayî bêrê pêser. Tîya de girîngîya têkoşînê enternasyomelî eşkera bîye.''