Îdarekarê Komeleya Kultur, Ziwan û Hunerî ya ANKA (ANKA-DER) Dogan Şensesî derheqê hêrişanê vera kultur û ziwanê kurdan de ANFyî rê qisey kerd.

Şensesî vist vîrî ke AKP bi rexnkerdişê tekperestîye û wesayetî bibi îqtîdar û vat: ''Îqtîdarî verê cû îdîa kerdêne ke meseleya kurdan do çareser bikero. La nika govende ra kurdî tepişîyenê, nuşteyê kurdkî rayîran ra esterîyenê. AKP-MHP bi teda keno ke erjanê kurdan çin bikero. Serranê 2000an ra ver bi taybetî 90an de kesê ke muzîkê kurdî hêrînayêne tepişîyayêne. Nika hukmatê AKP-MHPyî zî heman çi keno. Hukmatî vurîyenê la kerdişê vera kurdan nêvurîyenê. Kerdişê nê îqtîdarî ê îqtîdaranê bînan ra xirab ê.''

Şensesî dîyar kerd ke govend, muzîkê kurdkî, nuşteyê kurdkî ûsn. sûc nîyê û vat: ''Seba ke ma îsbat bikerê nê sûc nîyê hewceyê bi Qanûnê Bingeyî yan zî qanûnêkî çin o. Nê çîyî erjê tewr xozayî yê. Kurdî xora vera nê kerdişan wayîrê kulturê xo vejîyenê. Ganî ma her ca de bi ziwanê xo qisey bikerê û ziwanê xo bipawê.''

Şensesî îfade kerd ke sey ANKA-DERî ê qerardar ê ke vera înkarî xo ver bidê û têkoşînê xo pîlêr bikerê.