Hemserekê Pêroyî yê Partîya Herêmanê Demokratîke (DBP) Keskîn Bayindirî serra 2023yî hetê têkoşînê kurdan ra ercnaye û qala çîyanê ke 2024 de pabeyê kurdan ê, kerde.

Bayindirî vist vîrî ke serra 2023yî seba kurdan bi xoverdayîşî derbaz bîya û vat: ''Teyna Kurdîstan de teyna pêro Rojhelatê Mîyanênî de emser kurdan xoverdayîşêko pîl kerd. Heyf ke ma ancî bi meseleya kurdan kewenê serra 2024î. 

2023 de Rojhelatê Kurdîstanî de xoverdayîşê Jin, Jiyan, Azadî geş bi. Başûrê Kurdîstanî de serebûtê girîngî qewimîyayî ke serkewtişê weçînayîşanê Kerkûkî de ma ney vînenê. Hetê bînî ra 2023 de PDKyî xizmetê dewleta tirke ancî nêterikna. No zî xora tesîrê zaf çîyan keno.Şarê Başûrî hînî nê sîyasetê PDKyî qebul nêkeno. Rojawanê Kurdîstanî de hêrişanê dewleta tirke de xeylêk merdimê ma şehîd bîyî. Dewleta tirke Başûr û Rojawan de bi hawayêkê zelalî sûcanê şerî kena. Vakurê Kurdîstanî de şar 2023 de hertim payan ser û mîyanê xoverdayîşî de bi. Îqtîdarê AKP-MHPyî sey her wextî çareserîya meseleya kurdan peygoş kerde. Dewleta tirke û îqtîdarî bi şerê vera kurdan şar mehkumê xizanîye kerd.''

Bayindirî da zanayene ke tecrîdê serê Rayberê Şarê Kurdî Abdullah Ocalanî rojdemê înan o verên o û vat: ''Ciwanê ma 2023 de vera polîtîkayanê şerê taybetî û tecrîdê Îmraliyî payan ser de bîyî. Heyf ke 2023 de bi taybetî zîndanan de zulm zêdîya. Seba ma rojdemo tewr girîng bêguman tecrîd o. Birêz Abdullah Ocalanî ra 33 mengî yo xeberêke nêna girewtene. Mesuldarîya ma ya ke ma vera tecrîdî têkoşînêkê hîna bitesîrî bikerê. Nika seba azadîya Ocalanî zîndanan de grevê vêşanîye yeno kerdene. Ganî ma bi xurtî paştî bidê grevê tepişteyan.''

Bayindirî bale ante weçînayîşanê herêmîyan ê adara 2024î ser û vat: ''Ma wazenê weçînayîşanê herêmîyan de destkewteyanê xo bizêdînê, şaredarîyanê xo qeyûman ra apey bigêrê. Ma kenê ke têkoşînê xo yê kuçeyan xurtêr bikerê. Partîya ma û DEM Partî weçînayîşanê gulana 2023yî ra dima raştê rexneyanê girîngan ameyî. Ma nê rexneyî qetî peygoş nêkerdî. Ma goreyê nê rexneyan amadekarîya weçînayîşanê herêmîyan kenê. Ma paradîgma û stratejîya Rayîrê Hîrêyînî ser o têgêrenê. Weçînayîşanê herêmîyan de paradîgmaya Rayîrê Hîrêyînî do geş biba. Ma hetê DEM Partî de tewrê xebat û amadekarîyanê weçînayîşan benê.  Ma do qetî weçînayîşanê herêmîyan de ser bikewê, qeyûman bişawê û bi têkoşînê xo tecrîdî bişiknê.''