Tirkîya û Kurdîstan de ewro 60 mîlyon 697 hezar û 843 weçînitoxî do seba dîyarkerdişê serekkomar û wekîlanê dewrê 28. raya xo bidê. Raydayîş do 191 hezar sindoqan de mabênê 08.00-17.00 de bêro kerdene. 

Welat de 4 milyon 904 hezar û 672 weçînitoxî do reya verêne raye bidê. Zîndanan de zî 53 hezar û 172 kesî do raye bidê.

Weçînitoxî ganî pê karta xo ya nasnameyî şorê sindoqan ser.  Weçînitoxî mecbûr nîyê ke kaxizê weçînitoxîye xo de berê û eşkenê sîteya Heyetê Weçînayîşî yê Berzî (YSK) ra bimusê ke kamcîn sindoqe de raye bidê.

Gumrukan de zî raydayîş do heta saete 17.00 dewam bikero.

Seba serekkomarîye hîrê namzedî est ê

Seba weçînayîşê serekkomarîye hîrê namzedî est ê; Recep Tayyîp Erdogan, Kemal Kiliçdaroglu û Sînan Ogan. Muharrem Înceyo ke serê pusula de est o, roja îneyî xo namzedîye ra apey antbî.

Seba wekîlîye 24 partîyê sîyasîyî û 151 namzedê xoserî est ê. Weçînayîşan de 5 lîsteyê îtîfaqî est ê.

Partîya Ameyoxî ya Çep a Keske (Partîya Çep a Keske) û Partîya Karkeran a Tirkîya (TÎP) bi nameyê 'Îtîfaqê Kede û Azadîye' tewrê weçînayîşî benê.

Mîyanê Îtîfaqê Miletî de jî CHP, ÎYÎ Partî, Saadet Partîsî, Gelecek Partîsî, Demokrasî ve Atilim Partîsî (DEVA Partîsî) û Demokrat Partî est ê.

Mîyanê Îtîfaqê Cumhurî de AKP, MHP, BBP û Yenîden Refah Partîsî est ê. HUDA PAR zî mîyanê lîsteyanê AKPyî de tewrê weçînayîşan beno.

Qedexeyê weçînayîşî

Raydayîş saet 17.00 de qedîyeno. Saete 18.00 de qedexeyê weşanayîşê analîzanê weçînayîşî qedîyenê. 18.00 ra pey YSK do bieşko agahîyê serê weçînayîşan biweşano. Saete 21.00 ra pey dezgehê medya zî do bieşkê netîceyî biweşanê.

YSK goreyê rewşe do bieşko netîceyanê weçînayîşan saete 21.00 ra ver serbest bikero.

Endamê Meclîsî zî do ewro dîyar bibê. Weçînayîşanê Serekkomarîye de eke ewro namzedêk nêeşko se ra 50ê rayan bigêro, weçînayîşê serekomarîye do bimano tûrê diyînî. Nê halî de turo diyîn do 28ê gulane de bêro kerdene.