Sîyasetmedaranê kurdanê  ke surgun de yê derheqê weçînayîşanê 14ê gulane de ANFyî rê qisey kerd û venga weçînitoxan da ke raye bidê.

Şaredarê verênî yê Agirî Huseyîn Yilmazî ard ziwan ke şarê Agirî verî zî bi rolê xo têgêrabi û vat: ''Nîqaşê serê namzetan ganî qetî nêrê kerdene. Herinda ney de pêro kurdî ganî namzetan reyde bixebitê. Ganî ma naye sero bifikirê ke gelo çend rayan eşkenê bigêrê. Welatperwerîye na ya.''

Hemşaredarê verênî yê Rêya Armûşî Veysel Keserî vat: ''Şaredarîyê ma yenê xespkerdene, sîyasetmedarê ma tepişîyenê û dest nîyeno destkewteyanê kurdan ser. Nê weçînayîşî seba ke kurdî seserra diyîne de bi rûmet û îradeyê xo biciwîyê zaf girîng ê. Kurdî eşkenê Partîya Çep a Keske reyde sîstemê faşîstî ra bixelisê. Ma venga şarê xo danê ke wayîrê partîya xo vejîyo, bi can û zerrî bixebito û 14ê gulane de peynîya nê sîstemê zorbazî bîyaro.''

Şaredarê verênî yê Êlihî Nejdet Atalayî vat: ''Nê weçînayîşan ra dima Tirkîya de ya prosesê roşnîye yan zî prosesê tarîtîye do dest pêbikero. Pozîsyonê her kesî eşkera yo. Ya azadîye yan zî bindestîye. Seba kurdan, tirkan, boşnakan, armenîyan û ê bînan nê weçînayîşî krîtîk ê. Şarê kurdî wazeno faşîzmî birijno. Êlihî ra heta Amedî hîso verên wina yo.''

Hemserekê CDK-Fyî Abdullah Ulmezî vat: ''Mefteyo sîyasî nê weçînayîşan de destê kurdan de yo. Seserra komare bi seserra înkarê kurdan, sîyasetê qirkerdişê kurdan. Kurdî qerardar ê ke tarîxî bivurnê. Coka nê weçînayîşî seba kurdan zaf girîng ê.''

Şaredarê verênî yê Xinisî Hasan Basrî Firatî vat: ''Kurdê Ewropa ganî raya xo bidê Partîya Çep a Keske. Eke Erdogan û Bahçelî reyna bibê îqtîdar narey do kurdan qir bikerê. Qeyûman dest na şaredarîyanê ma. Îqtîdarî seba çinkerdişê destkewteyanê kurdan sond werdo. Weçînayîşê 14ê gulane seba dîyarkerdişê ameyoxê şarê kurdî firsendêko tarîxî yo. Ganî ma nê weçînayîşan de raya xo bidê xo.''