Wekîlê HDPyî roja 17. de vera tecrîdê serê Rayberê Şarê Kurdî Abdullah Ocalanî Nobeta Edaletî rê dewam kerde. Wekîlan Muazzeze Orhan, Remzîye Tosun, Huseyîn Kaçmaz, Kemal Pekoz, Erdal Aydemîr, Celadet Gaydali û Abdullah Koç bi dovîzanê  ''Tecrîd sûcê merdimîye yo'' û ''Wa Îmrali de huqûq bêro caardene'' verê Berê Dîkmenî yê Meclîsî de eşkerayîye daye.

Wekîlê HDPyî yê Şirnexî Huseyîn Kaçmazî ard ziwan ke polîtîkayê tecrîdî bi xorîbîyayîşî dewam kenê û vat: ''Ewro pê tecrîdê serê Birêz Ocalanî heme heqê merdiman gerîyenê binê lingan.  Dewlete ganî pabesteyê qanûnê xo bi, goreyê qanûnan têbigêro. Heqê her kesî yê keyeyî û avûkatan est o la no heq di serrî yo Îmrali de pê tecrîdî yeno astengkerdene. Tecrîd Kurdîstan û Tirkîya ra vila bîyo. Ewro şarê Tirkîya zî binê tecrîdî de yê. Rîyê tecrîdî ra Tirkîya mîyanê krîzan de ya. Tecrîd sûcê merdimîye yo. 17 rojî yo ma tîya ra qîrenî la çew vengê ma nêeşnaweno. Eke na dişmenîya vera kurdan nêbîyêne berê Îmraliyî ameyêne akerdene û Birêz Ocalanî verê şer û pêkewtişan girewtêne. Heta ke vengê Birêz Ocalanî nêro eşnawitene şer beno xorî. Mifteyê çareserî Imrali de yo. Îqtîdar genî nê bivîno.  Îqtîdar qey haştîye ra terseno? Qey şarê kurdî û şaranê Tirkîye anceno mîyanê şerî? Ganî her kes vera tecrîdî vengê xo berz bikero, têbigêro.''