Kampanyaya globale ke seba azadîya Rayberê Şarê Kurdî Abdulah Ocalanî dîyaybî dest pêkerdene, Bruksel de bi yew kombîyayîşê çapemenîye derbazê merheleyêko newe bîye. 2 serrê vernîya ma de do azadîya Ocalanî bibo rojeve.
Bruksel de, Merkezê Çapemenîya Ewropa de, Kampanyaya Neteweyî ya Ocalanî rê Azadîye ser o kombiyayîşê çapamenîye ame viraştene. Îtalya, Îngilistan û welatê Baskî ra kesê namedarî tewrê kombîyayîşî bîyî. Kombiyayîş de verê Temsîlkarê Înîsîyatîfê Mîyanneteweyî yê Abdullah Ocalanî rê Azadîye, Kurdîstan rê Aştîye Havîn Guneşere ANF rê qisey kerde. Guneşere da zanayene ke ê kampanya kirişen merheleyêko newe û ê do emser û serrna seba azadîya Ocalanî do çalakîyan bivirazî.
WAXTÊ CI AME
Guneşere eleqe ante tecrîdê giranî yê Îmrali û zextê Tirkîya ser û wina va: “Wextê azadîya Ocalanî ameyo. Azadîya Ocalanî Tirkîya û Rojhelato Mîyanên rê zî aştîye ano. Tirkîya de demokrasî kilîtê aştî û çareserîya meseleya kurdî ya. Kilîtê demokrasî û aştîye zî Abdullah Ocalan o.”
Guneşere viste vîr ke kampanya 2 serrî yo dewam kena û wina dewam kerde: “Ma peroyîya dinya de bi waştişê azadîya Ocalanî 10 mîlyon îmzeyî arê dayî. Wa herkes seba azadîya Ocalanî û aştîya Kurdîstanî têbigero. Çimkî wextê ci ameyo.”
ARNALDO OTEGÎ: EZ SEBA PAŞTÎDAYÎŞÊ HEMRA OCALANÎ AMEYA
Hetkarê Tevgerê Xoserîye, baskij Arnaldo Otegî ke Koordînatorê Pêroyîya Koalîsyonê Euskal Herrîa Bîldu yo, wina va: “Ez ser nameyê Tevgerê Xoserîye yê Baskî ra seba paştîdayîşê hemra Ocalanî ameya.”
Otegî ke wextê aştîya Baskî de rolêko gird kay kerdo, da zanayene ke o zî 14 serrî zindan de mendo û wina va: “Ma hol zanenê ke tecrîdo ke Ocalanî ser o yeno domnayene, yeno waştene ke ceza bidîyo heme kurdan. Ma tîya ra seba pêkerdiş û muzakereyan veng danê û wazenê meselaya kurdî bêro çareser kerdene. Abdullah Ocalan tena seba kurdan nimune nîyo, ê ke wazenê rewşa dînya hol bikerî, înan rê zî nimune yo, hemra û yew dostêk o. Coka azadiya ey tena seba kurdan nê, eynî wext de ma heme ke yew dinyaya edil wazenê, ma rê zî zaf muhîm a.”
SENDÎQAYA DÛRHAM MÎNERSÎ RA PAŞTÎDAYÎŞ
Temsîlkarê Sendîqaya Dûrham Mîners Assocîatîonî ya Kralîyetê Yewbîyayîşî Joseph Whîtwortî eleqe ant tekoşînê kurdan ser û ard ziwan ke heta kurdî heqê xo yê xo îdareyî dest bifînî û Ocalan azad bibo ê paştîdayîşê xo domnenî.
Dûrham Mîners sey yew sendîqaya girde ke na kampanya de eleqe ancena xo ser. 14 û 16ê temmûze de festîvala xebatkaran ya tewr girde ya dinya “Dûrham Mîners Gala” Ocalanî rê amebî dîyarî kerdene.
DE MAJO: OCALAN TEMSÎLKARÎYA CUYA ORTAXE KENO
Endamê Meclîsê Şaredarîya Napolî û Delegeyê Şaredarî Lûîgî De Magîsrîsî Eleonora De Majo da zanayene ke o sey temsîlkarî Şaredarîya kombîyayîşî de ca geno û bajarê Napolî tekoşînê kurdan rê heyran o û ê paştî dane xoverdayîşê azadîye û demokrasî yê kurdan.
De Majo vist vîr ke Şaredarîya Napolî serra 2016î de welatîbîyayîşê rûmetinî daya Ocalanî û eynî sebebî ra 2018 de Kobanê reyde bîyî şaredarîya waye-birayî û wina va: “Ocalan bingeyê cîya-cîya îttîqat û kulturan de temsîlkarîya cuya ortaxe keno.”
WEXTÊ WEDARNAYÎŞÊ BÊVENGÎYE AMEYO
De Majo va: “Ma heme çî ra ver şertanê zehmetinan yê Ocalanî ver etirîyenî û wazenê ke Ocalan cade serbest bêro veradayene. Ma bawer kenê ke no seba aştîya mende ya Rojhelatê Mîyanênî gamêka muhîme ya. Azadîya Ocalanî îstîkrarê Ewropa ser o zî têsîrêko hol kena. Coka ganî komelê Mîyanneteweyî wayîrê tekoşînê kurdan bivejîyo û seba azadîya Ocalanî çîyêk bikero. Kurdî seba pawitişê merdimîye vera DAIŞî de bedelê giranî dayî. Êdî wextê wedarnayîşê bêvengîye ameyo. Ganî ma seba azadîya Ocalanî û kurdan têbigerê.”
KAM PAŞTÎ DANO KAMPANYAYA AZADÎYA OCALANÎ?
Kampanyaya Ocalanî rê Azadîye, rayberê Afrîkaya Başûrî Nelson Mendelayî ra nata sey kampanyaya azadîye ya tewr girde eleqe ancena xo ser. Roşinvîr, sîyasetkar û sendîqayê ke bi mîlyonan endamê înan estî û xeylê tevgerê bînî paştî danê ci. Paştîkaran ra tayê ci wina yî: Maîread Maguîre ke wayîrê xelata aştîye ya Nobelî yo, Noam Chomsky, Serokkomarê verênî yê Rojhelatê Tîmûrî Jose Ramos- Horta ke wayîrê xelata aştîye ya Nobelî yo, Prof. Angela Davîs, Afrîkaya Başur ra Serpîskopos Desmond Tutu ke wayîrê xelata aştîye ya Nobelî yo, raybero îrlandayij Gerry Adams, raybero baskij Arnaldo Otegî, sendîqaya Îngilistan û Îrlanda Unîte the Ûnîon, sendîqaya peroyîya Kralîyetê Yewbîyayîşî GMB û reyna sendîqaya Dûrham Mîners Assocîatîonî.
