''Vernîyazê qanûnê Vurnayîşê Tay Qanûnan û Qanûnê Derheqê Caardişê Tedbîranê Asayîşî û Ceza'' 70 madeyan ra yeno meydan ke hetê AKP-MHPyî ra ame amadekerdene û tepişteyanê sîyasîyan zî teber de verdeno. Vernîyaz Komîsyona Edaletî ya Meclîsî de ame qebulkerdene. Vera vernîyazî nêrazîbîyayîşî zî dewam kenê.

Hemserekanê Komeleya Heqanê Merdiman (ÎHD) Erene Keskîn û Ozturk Turkdoganî derheqê babete de ANFyî reyde qisey kerd û vat no nêzdîbîyayîş goreyê huqûqê dişmenî yo.

Turkdoganî pare kerd ke vernîyaz cîyatîye ser o ame amadekerdene û herinda çareserkerdişê meseleyan de meseleyê neweyî viraştî. Turkdoganî îfade kerd ke mumkîn nîyo ke qanûn bi nê hewayî bêro qebulkerdene û vînayîşê asayîşperwerîye yê îqtîdarê AKP-MHPyî tesîrê vernîyazî kerdo.

Turkdoganî vat: ''Îqtîdar seba ke muxalîfan zîndan de verdo Qanûnê Têkoşînê Vera Terorî û sîstemê hukmkerdişî yê taybetî xebitneno. No vernîyaz mojneno ke no tewir wextê janî de zî dewam keno. Tirkîya nê dewletan ra ya ke tede tepişteyê sîyasîyî zêde yê. Vîrusê Korona tewr zaf zîndanan rê gef waneno û rewşêka winasêne de nêzdîbîyayîşêko winasên ê vera tepişteyan yeno manaya huqûqê dişmenîye. Eke wina dewam bikero serewedaritişê sey ê Zîndanê Êlihî do biqewimîyê. Waştişan rê cewab nêno dayene. Eke şima wina cîyatîye bikerê ganî xo seba nêrazîbîyayîşan zî amade bikerê.''

Erene Keskîn zî eşkera kerd ke vernîyazo ke Komîsyona Edaletî ya Meclîsî de ame qebulkerdene, vernîyazo bêdûşt o. Keskîne vat: ''No qanûn heman wextî de derbêka pîle dano Qanûnê Bingeyî yê Tirkîya zî. Şert û mercê zîndanan nika seba ciwîyayîşî biasayîş nîyê û zîndanan de 30-40 tepişteyî heman koxuşî de manenê. Rewşêka winasêne de kes nêeşkeno qala mesafeyê komelkîyî bikero. Eke vernîyaz bi nê hawayî bibo qanûn ganî Mehkemeya Qanûnê Bingeyîyî dewaya batalkerdişî abikera. Eke şima Alaattîn Çakici vejenê la Selahattîn Demîrtaş zîndan de biverdê, no yeno manaya nêzdîbîyayîşê goreyê huqûqê dişmenîye.''