Wezîrîya Karanê Zereyî di reyî muracatê Heyetê Weçînayîşî yê Berzî (YSK) kerd ke hêzê polîs û cendirmeyan Merkezê Koordînasyonê Rewşanê Lezabezan û Asayîşî (GAMER) de netîceyanê weçînayîşan sindoqan ra arê bidê. Wezîrîya Karanê Zereyî verê cû zî muracatê YSKyî kerd ke agahîyanê weçînitoxan arê bida. Waştişê Wezîrîye hetê YSKyî ra ameyî redkerdene.

Endamanê OHDyî Gurkan Îsteklî û Hemsereka OHDyî Ekîne Yeter derheqê babete de ANFyî rê qisey kerd.

Îsteklîyî ard ziwan ke waştişê wezîrîye goreyê Qanûnê Bingeyî nîyê û vat: ''Goreyê qanûnan teyna YSK eşkeno weçînayîşan ser o bibo wayîrê selahîyetan. Nê waştişê Wezîrîya Karanê Zereyî binpaykerdişê Qanûnê Bingeyî yo. Pê cendirme û polîsan arêdayîşê rayan xîretê darbe yo. Eke wina bibo weçînayîşî do demokratîk nêbê. A raşte wezîrîye YSKyî rê bêhuqûqîye ferz kena.''

Ekîne Yeter pare kerd ke şar derheqê asayîşê weçînayîşan de qerqilîyeno la  yew hezar û 600 avûkatî do sindoqan de wezîfe bikerê. Ekîne Yeter pare kerd ke ê seba ke verê qesawetê şarî bigêrê xebitîyenê û vat: ''Sey OHDyî ma seba asayîşê weçînayîşî destê ma ra çi bêro bikerê. Eke rewşêka bêusûle û xelete biqewimîya zî avûkatî cade mudaxele bikerê.''