Partîya Çep a Keske Vakurê Kurdîstanî û Tirkîya de, bi akerdişê buroyan û kombîyayîşanê şarî xebatê xo yê weçînayîşî vizêr zî ardî ca.

Dêrsim

Taxa Sîhenkî de bi beşdarîya namzeta wekîlîye Aytene Kordu buroyê weçînayîşî ame akerdene. War bi alanê partîye xemilîya û sloganê 'Jin, Jiyan, Azadî' ame vatene. Aytene Kordu akerdiş de qisey kerd û vat: ''Bi serran nasnameyê ma, ziwanê ma û bawerîya ma çin hesibîyayî. Ma têgêrayîşêko winayên ê ke bi rengînîya xo pîya ciwîyenê.''

Buro bi govendan ame akerdene. Aytene Kordu akerdişê buroyî ra dima esnafî zîyaret kerd û goş na meseleyanê înan ser.

Şirnex

Qezaya Qilebanî de bi beşdarîya namzetanê wekîlîye Newroz Ûysal, Zekî Îrmez, Ayşegul Dogan, Bedîrhan Osal, rêxistinanê HDP û DBPyî buroyê weçînayîşî ame akerdene. Wekîlê HDPyî Hasan Ozguneşî û namzetan akerdiş de qisey kerd. Înan  pare kerd ke AKP-MHP kurdan rê qirkerdiş keno ferz la kurdî cewabê hêrişanê îqtîdarî do sindoqan de bidê.

Qers

Namzetî Gulîstan Kiliç Koçyîgît û Gulcan Alp, Hemşaredara Qersî Şevîne Alacaya ke dest nîyabî wezîfeyê ci ser, taxa Halîlpaşayî û Yenîşehîrî de şarî reyde ameyî têhet. Hîrê cinîyan zî ard ziwan ke cinîyê kurdî do ameyoxî bivurnê.

Colemêrg

Qezaya Çeleyî de bi beşdarîya namzetan verî esnafî ameyî zîyaretkerdene, dima zî bi coşî buroyê weçînayîşî ame akerdene. Namzetan Oznure Bartin û Onur Duşunmezî, Wekîlê HDPyî yê Colemêrgî Saît Dedeyî, Endamê MYKyî yê HDPyî Abdullah Zeydanî akerdiş de qisey kerd û vat: ''Ma pê şarê xo bawer ê. Rayberê ma akerde bibo.''

Amed

Qezayê Peyasî de bi beşdarîya namzetan Adalet Kaya, Sevîlay Çelenk, Halîde Turkoglû, Cengîz Çandar, Azad Bariş, Mehmet Emîn Aktar, Hemvervatoxa Partîya Çep a Keske ya Amedî Pinare Sakik Tekîn, Hemserekê DBPyî yê Amedî Hayrettîn Altun, Hemserekê HDPyî yê Amedî Zeyyad Ceylan buroyê weçînayîşî bi sloganê ''Jin, Jiyan, Azadî'' ame akerdene.

Heyetî dima taxa Altiokî ya Bismilî de zî buroyê weçînayîşî akerd û fitarî ra dima zî şarî reyde rayraşîyayîşêk kerd. Rayraşîyayîş de sloganê "Bijî Serok Apo" û "Jin jiyan azadî" ameyî vatene. Wesayîtanê polîsan vera şar tacîz kerd.

Dima qezaya Rezanî de zî buroyê weçînayîşî ame akerdene.

Mêrdîn

Qezaya Kerboranî de bi beşdarîya namzet George Aslan, Hemserekanê HDPyî ya Mêrdînî Bêrîvane Bahçecî û Yuksel Oguzî buroyê weçînayîşî ame akerdene. Qiseykerdişan de ame vatene ke rayîrê înan roşnî yo û ê do Mêrdîn de 6 wekîlîyan zî bigêrê.

Qezaya Nisêbînî de zî buroyê weçînayîşî yê cinîyan ame akerdene. Namzetanê wekîlîye Bêrîtane Guneş, Leyla Kaya akerdiş de qisey kerd. Polîsanê tirkan sloganê ''Bijî Serok Apo''yî rê tehamul nêkerd û hêrişê girseyî kerd. Girse reyna bi slogananê ''Ma do bi xoverdayîşî ser bikewê'' verê polîsan vejîya. Polîsan xeylêk kesî destbend kerdî.

Şaristananê Tirkîya Anqara, Îzmîr, Balikesîr û Aydinî de zî buroyê weçînayîşî û kombîyayîşê şarî ameyî kerdene.