Qezaya Xelatî ya Bedlîsî de seba qasê 5000 tirkane Ahiska bînayî rixmê şertanê varayîşî zî dewam kenê. Nika nê tirkî otêl û dezgehanê dewlete de manenê. Dewleta tirke seba ke demografîya Xelatî bivurna 500 banê TOKÎ viraştî û tirkî nînan de cakerdî. 2022 de Xelat de 200 banî seba 2500 tirkanê Ahiska virazîyayî. Nika zî seba 3500 tirkanê Ahiska 300 banî virazîyenê.

Walîtîya Bedlîsî rixmê serdê zimistanî zî tedaya karkeran kena ke wa înşaetê banan biqedînê. Walîtîye bi rayîrê leşkeran karkerî înşaetan de arê dayî, tehdît kerdî û vat: ''Wa nê banî weçînayîşan ra ver biqedînê. Nêbo kurdî do şaredarîye bivisnê destî. Karkerê ke nêxebitê do bêrê destbendkerdene.''

Weçînayîşanê 2014î de dewleta tirke û îqtîdarê AKP-MHPyî Xelat de sextekarîye kerdbî. Weçînayîşanê herêmîyan de namzetê BDPyî Abdurrahman Dogar ser kewtbi la dima AKPyî Heyetê Weçînayîşî de pêvînayîş kerd û namzetê xo sey şaredarî îlan kerdbi.  Weçînayîşanê herêmîyan ê 2019î de zî heman çi qewimîyabi.

Dewleta tirke seba vurnayîşê demografîya herême 2016-2017 de ancî Xelat û Erzîngan de tirkê Ahiska cakerdbî.