Torra Akademîsyenanê Kurdan (KURD-AKAD) sey her serre emser zî xelatî dayî. Merasîmê xelatdayîşî şaristanê Kolnî yê Almanya de ame kerdene.

KURD-AKADî xelata paştdayîşî daye wekîlê HDPyî yê verênî Dr. Îdrîs Balukenî û xelata taybete zî daye Sereka Komîsyonê Sivîlî yê Tirkîya-Yewîya Ewropa Prof. Kariane Westrheim û Prof. Dr. Ian Îlhan Kizilhanî.

Hemserekê KURD-AKADî Dr. Dêrsim Dagdevîran, wekîlê HDPyî yê verênî Lezgîn Botan, Nursele Aydogan, Sîbele Yîgîtalp, Hemsereka KCDK-E Zubeyde Zumrut, Wekîla Partîya Keskan a Almanya Berîvane Aymaz zî tewrê merasîmî bîyî.

Nameyê Îdrîs Balukenî ser o wekîlanê HDPyî yê verênan xelate girewte. Lezgîn Botanî mesajê Balukenî wend û vat: ''Ma do seba azadîya Kurdîstanî û cuya têdûşte tim xo ver bidê.''

Dima Prof. Kariane Westrheim xelata xo girewte û vat: ''Ez na xelate nameyê waştoxanê azadîye û têkoşeran ser o gêna. Şarê kurdî seba pêro dinya fedakarîye keno.''

Nameyê Prof. Dr. Ian Îlhan Kizilhanî ser o Wekîla Partîya Keskan Berîvane Aymaz xelate teslîm girewte.

Merasîmê xelatdayîşî de hunermend Mehmet Akbaş vejîya sehne ser. Merasîm bi deyîranê Akbaşî qedîya.