Îstanbul de operasyonanê qirkerdişê sîyasîyî de Mayê Haştîye zî tede xeylêk cinîyî ameyî destbendkerdene. Reyna Amed, Dîlok û şaristananê bînan de tewr tay 165 kesî ameyî destbendkerdene.
Îstanbul de serê sibayî polîsanê tirkan eşt xeylêk keyeyan ser. Sereştişan de Mayê Haştîye zî tede xeylêk cinîyî ameyî destbendkerdene. Destbendkerdeyî ameyî berdene bi Mudirîya Asayîşî ya Îstanbulî.
Nameyê tay destbendkerdeyan wina yê: Çalakîkerê Nobeta Edaletî Kumrî Akgul û Gulsume Ozturk, Mayê Haştîye Fatma Yilmaz û Bedîa Gokguz, Sereka Komeleya Wextê Cinîyan Dîleke Başalan, Endama Meclîsê Cinîyan a DEM Partî Besere Çelîk, aktîvîstê TJA Vetha Bîngol û Suna Kaymaz, Hemsereka verêne ya HDPyî ya Geverî Selcane Saygi, hunermendê MKMyî Dîlane Suyu û Zehra Suyu, Sihat Yilmaz, Şukrane Tugay, Gonule Kahraman û Yusuf Açar.
Dîlok de bi fermanê Serdozgerîya Komare merkezê Şahînbeyî de Kamîle Aras (55) û Endamê Meclîsê Ciwanan ê DEM Partî Ferhat Ozmen ameyî destbendkerdene. Dîya zanayene ke Endamê Meclîsê Ciwanan ê DEM Partî Bunyamîn Dogan ser o zî bira destbendkerdişî est a la seba ke o keye de nêbi nêame destbendkerdene.
Amed de sereştişan de Mehmet Oruçlu, Ferhat Çîçek û Umut Oktay ameyî destbendkerdene. Sereştişan de keyeyî ameyî serûbinkerdene. Sebebê destbendkerdişan nêzanîyeno.
Adana de çarçewa îdîaya 'propagandaya rêxistine' de bi fermanê Serdozgerîya Komare ya Adana polîsan qezaya Yuregîrî de eşt keyeyan ser û parekerdişanê înan ê medyaya dîjîtale ra Bêrîvane Akalin destbend kerde.
Wezîrê Karanê Zereyî yê dewleta tirke Alî Yerlîkayayî bi eşkerayîyêke pare kerd ke 28 şaristanan de bi temamî 165 kesî ameyî destbendkerdene.
