Fina Ewropa de yew ciwanê ma bedenê xo da adirî ver. Çunke dişmenî bi xedarî yenê kurdan ser. Kurdî zî heme hetan ra xo ver ro danê. Ciwanê ke êlihij o, verê çalakîye virazo yew video zî viraşto. Amancê çalakîya xo tede ano ziwan.

Ciwanê ma seba ke Rayber Abdullah Ocalanî ser o tecrîd esto, dewletê Ewropa vera tecrîdê ser Rayberîye û şerê vera kurdan de yeno kerdene de bêveng ê û Erdoganê qatilî kenê meymanê xo, adir verda ganê xo.

Bêgûman xo adirî mîyan de helênayîş zehmet o. Her keso biwazo nêşeno xo biveşno. Êyê xo veşnenê êdî tehamûlê ci vera kerdenanê dişmenan de nêmaneno coka xo veşnenê û xo veşnayîş beno yew çalakîya ke vera dişmenî de yena kerdene. Fina hetê fikrî, bawerî û welatperwerî ra kesêk raver nêşiro, nêşeno xo biveşno.

Tarîxê têkoşînê ma de xoveşnayîş zî rastîyêk o. Labelê xo veşnayîş yew metodo daîm nîyo. Wexto ke Şehîd Mezlûm Doganî xo veşna, veşnayîşî ra teber destê ci de çi çî çin bî ke çalakîyêka bîne bikero. Mezlûm Doganî bi çalakîya xo ya tarîxî de vernîya xoverdayîşê zîndanan akerd. Badê cû Zekîye Alkane fina sey Mezlûm Doganî xo Newroza serra 1991î de kela Amedî de veşnaye. No zî nîşaneyê welatperwerîye bi û çalakîye venga şarê kurdî dayêne. Şarê kurdî zî veng heşna û Kurdîstanî de serhildanî dest pêkerdî. Serra 1992î de Rehşan Demîrele Îzmîro ke yew şaristanê Tirkîya yo de, xo veşnaye û manaya çalakîya aye ‘her çiqas ke welat ra dûrî xerîbîye de zî bibê, ganî kurdî fek welatê xo ra nêverdê’ bîye. Wexto ke Rayber Abdullah Ocalan kewte destê dewleta tirke bi desan kesî bedenê xo dayî ver adirî. Bi no tewir wayîrê Rayberîya xo vejîyayêne. Çunke sewbîn çare çin bî.

Nê serran ra tepîya ge-ge mîlîtanî ge-gane welatperwerî seba Rayberîye xo veşnenê. Seke Rayberîye bi xo zî vano, no tewir çalakîye kerdiş û xo veşnayîş rast nîyo. Çirê? Nika destê her kurdî de îmkanê têkoşînî esto. Yanî ganî nîyo kes seba Rayberîye û kurdan xo biveşno. Her kes eşkeno hetêk ra têkoşîn bido. Eke ciwan o, herinda ke xo biveşno ganî dişmenê xo biveşno. Herinda ke peynîya cuya xo bîyaro, wa dişmenê xo ra hesab biperso. Kes eşkeno gerîlatîye bikero. Eşkeno sîyaset, dîplomasî ûsn karanê cîya-cîyayan bikero. Xora dişmenî kurdan merde wazenê. Ê vanê kurdî ganî ya merde bê yan zî koleyê ma bê. Eke ciwanê kurdî zî herinda ke dişmenê xo biveşnê bêrê xo biveşnê peynîye de dişmenî kenê şa. Dişmen xora merdişê kurdê azade wazeno. Ganî kes bi çalakîye û kerdenanê xo yê cîya-cîyayan xizmetê dişmenî mekero. Xizmetê şarê xo bikero. Têkoşîn gird bikero û raver bero. Ma bi xo veşnayîşê winasî têkoşîn beno gird!

Kesêk eke wazeno ganê xo bikero fedayê şarê xo, ganî baş bifikiro û bireyê xo winî bido. Gandayîş rehet nîyo. Ganî her gandayîşêk têkoşînî berz kero. Şarê kurdî bihêz kero, dişmenî zeîf kero. Eke wina bî manaya çalakîyan bena. Nêke ma do vajê ez xo kena feda la xo fedakerdişî de dişmen do bihêz bibo.

Ganî kurdî çalakîyanê xo de gonîya xo dalpe bi dalpe rokerê û peynîye de dişmenî bin fînê!

Çime: Yenî Ozgur Polîtîka