Rayberê Şarê Kurdî Abdullah Ocalan hema zî binê tecrîdêkê giranî de yo. Tepişteyê sîyasîyî vera tecrîdê Îmraliyî û binpaykerdişê heqanê xo 200 rojî yo grevê vêşanîye de yê. Waştişê înan zelal û mehqûl ê: Ganî Abdullah Ocalanî reyde pêvînayîş bêro kerdene û binpaykerdişê heqan biqedo.

Serra 2012î de netîceya grevê vêşanîye yê 68 rojan de Wekîlanê Partîya Demokrasî û Haştîye (DBP) Ahmet Turk û Ayla Akat Ata Îmrali de Abdullah Ocalanî reyde pêvînayîş kerd. Dima heyetanê HDP û dewlete heta 5ê nîsana 2015î binê nameyê 'prosesê çareserîye' de Îmrali de pêvînayîşî kerdî.

Dima ke proses qedîya tecrîdê Îmraliyî ame girankerdene. 50 sîyasetmedaranê kurdan vera tecrîdî 5ê êlûla 2016î de bînaya DBPyî ya Amedî de dest pê grevê vêşanîye kerd. Netîce de birayê Abdullah Ocalanî Mehmet Ocalanî 11ê êlula 2016î de şi Îmrali.

Îqtîdarî tecrîdî ra fek vera nêda û 8ê teşrîna peyêne ya 2018î de Hemereka Kongreya Komelê Demokratîkî (KCD) û Wekîla HDPyî ya Colemêrgî Leyla Guven Zîndanê Amedî de dest pê grevê vêşanîye kerd. Tepişteyan zî 16ê kanûne de, Hewlêr de endamê HDPyî Nasir Yagiz û Kampa Mexmûrî de Fadîke Tok 1ê adare de, Strasbourg de 14 kesan dest pê grevê vêşanîye kerd. Wekîlanê HDPyî Dersime Dag û Murat Sarisaçî zî 3ê adara 2019î de dest pê grevî kerd. Semedo ke tecrîd nêwedarîya 15 tepişteyan 30ê nîsana 2019î de û 15 tepişteyan zî 10ê gulane de dest pê rojeyê mergî kerd.

Şaristanê Krefeldî yê Almanya de Ugur Şakarî verê mehkeme de bedenê xo da adirî ver û şehîd bi. Zîndanan de Zulkuf Gezen, Ayten Beçet, Zehra Saglam, Medya Çinar, Yonca Akici, Sîraç Yuksek, Mahsûm Pamay çalakîya fedayîye kerde û şehîd bîyî.

Nê grevê vêşanîye 200 rojan dewam kerd. Netîceya ci de 8 serran ra dima Rayberê Şarê Kurdî Abdullah Ocalanî reyde 2-22ê gulane de, 12-18ê hezîrane de û 7ê tebaxa 2019î de pêvînayîşê avûkatan ameyî kerdene. Vengdayîşê Ocalanî ser o 26ê gulane de grevê vêşanîye û rojeyê mergî qedîyayî.

Tepişteyê ke çalakîye de yê benê hedef

107 zîndanan de 200 rojî, Mexmûr de 179 rojî û Yunanîstan de 162 rojî yo grevê vêşanîye dewam keno. Destpêkerdişê grevê vêşanîye ra nata hêriş û tedaya vera tepişteyan zêdîyayî.

Hemserekê KCDyî Berdan Ozturk û Hetkarê Hemserekanê HDPyî yê Komîsyonê Heqanê Merdiman û Huqûqî ra Berpirsîyar Umît Dedeyî derheqê tecrîdê Îmraliyî û xoverdayîşê zîndanan de ANFyî rê qisey kerd.

Berdan Ozturkî vat: ''Na mesuldarîye tepişteyan rê mende. Ganî ma pêro seba ney rexneyanê xo bidê. NNê welatî de meseleya tecrîdî pê ferzkerdişê neçareserîye dest pêkena. Ganî her keso ke wazeno welatêkê azadî de biciwîyo vera tecrîdî têbigêro. Meseleya kurdan de aktoro verêno sîyasî Abdullah Ocalan o. Semedo ke mesele nêra çareserkerdene îqtîdar tecrîdî ano ca. Şar, dezgeh û partîyî eşkenê pê çalakîyan peynîya tecrîdî bîyarê. Tecrîd meseleya ma ya esas a. Çêrîye do teda û zorbazîye wedarna. Xoverdayîşê Abdullah Ocalanî seba ma çêrîya hewce ya. Dima ke hende lêşinîyî eşkera bîyê ganî ma zêdêr çêr bê. Ma çend vengê xo berz bikerê îqtîdar hîna lez şino.''

Umît Dedeyî zî da zanayene ke grevê vêşanîye bi hawayêkê qînî nêame rojdem û no zî semedê înan sebebê xorexnekerdiş o. Dedeyî vat: ''Kurdîstanij û dezgehê Ewropa zêdêr vera tecrîdî aktîf ê û xoverdayîşê înan zaf ercîyaye yo. Ganî ma zî vera tecrîdî vengê xo zêdêr berz bikerê. Heta ke destê ma ra ame ma sey Komîsyonê Huqûqî yê HDPyî xîret kerd. Ma do prosesê ameyoxî de zî vera tecrîdî û seba caardişê waştişanê tepişteyan çalakîyanê xo bizêdînê. Ma na babete de bire girewte, plansazîyêka xurte kerde. Ma do eşkerayîyan bidê, rayraşîyayîşan bikerê, rêxistinanê komelê sivîlî reyde pêvînayîşan bikerê û partîyan reyde ronişê.''