Tepişteyo nêweş Bîşar Yaziciyo ke temmuze de Zîndanê Wanî de dinyaya xo bedilnabî, derheqê ci de mengan ra dima Mehkemeya Berze ra teblîqat ame. Avûkatan Mehkemeya Îstînafî sey mesuldara mergê Yaziciyî mojnaye.
Tepişteyê nêweşî Bîşar Yaziciyî Zîndanê Wanî de nêweşîye ra temmuze de dinyaya xo bedilnabî.
Yazici bi sûcdarîya 'endamîya rêxistine' tepişîyabi û ci rê cezaya zîndanî ya 6 serran dîyabî. Yaziciyî Mehkemeya Îstînafî de ceza rê îtîraz kerdbi.Dayîreyê Ceza yê Mehkemeya Edlîyeya Wanî bira mehkeme erjnabî û tesdîq kerdbî. Rixmo ke Yazici nêweşê kanserî bi zî erşawîya zîndanî.
Avûkatanê Yaziciyî seba ke karê caardişê bire bi hawayêkê raştî nêame kerdene waştişnameyê îtîrazî şawitî la rixmê ney zî pêro waştişî ameyî redkerdene. Bîşar Yazici nê mabênî de 8ê temmuza 2023yî de zîndan de şi rehme.
Mergê Yaziciyî ra dima Dayîreyê Ceza yê Mehkemeya Berze mehkemeya herêmîye ra waşt ke Yaziciyî rê teblîgat bikera ke waştişê ci yê temyîzî est o yan ney. Mehkemeya herêmîye zî cewabê xo de dîyar kerd ke Yaziciyî dinyaya xo bedilnaye coka hînnî teblîgat nêerşawîyo.
Avûkatan bale ante nê skandakê mehkemeyan ser û vat: ''Hetê mehkemeyan ra merdimî terkê mergî yenê kerdene.''
