Wekîla DEM Partî ya Amedî Adalete Kaya polîtîkayê qeyûmî û weçînitişê cayî yê verê ma  ANFyî rê erjnayî.

Kaya qeyûmî sey antîdemokratîkî name kerdî û vat no caardişo ke îradeyê şarî nas nêkeno cayê ci huqûq de çîn o. Adalete Kaya nê vatî: ''Xora bi serran bi metodanê cîya cîyayan îradeyê şarî nas nêkenê. Qeyûm zî înan ra yew o. Bitaybetî vera destkeweyanê cinîyan hêrişî ameyî kerdene. Nînan ra tewr muhîm zî sîstemê hemserekîye bi û çîyo bîn zî mekanîzmayê ke semedê xurtkerdişê torra paştîdayîşî ameyî ronayene, kooperatîfî, merkezê paştdayîş û hetkarî bî. Qeyûmî tewr zaf vera destkewteyanê cinîyan ê.

Hîrê dewranê peyênan de modelê hemserekîye est o. Hema semedê şaredarîyan fermî mebo zî semedê nê zî têkoşînê ma dewam keno.  No xora semedê îqtîdarî meseleya krîtîk a.  Nê sey tehdîtî vîneno. Çîyêko hol o îqtîdar tim vera ci yo. Hemserekê ma yê cinîyî hema zaf zîndan de yê û zafê înan zî bado ke xeylêk zîndan de mendî ameyî veradayene.  Guletene Kişinak na mana de fîgurêka muhîm a. Rixmo ke cezaya aye qedîyaye hema zî zere de ya.  Zaf muracatkerdişê namzedîye yê cinîyan vera hedefgirewtişê sîstemê hemserekîye û destkewteyanê cinîyan mesajêko muhîm o. ''

Kaya ard ziwan ke badê weçînitişê hezîrene rexneyê ke partîya înan rê bîyî, ê nînan ser vindertî  û vat, ''Îdareyê partîya ma nê rexneyî erjnayî û do goreyê ci têbigêro. Semedê nê kombîyayîşê şarî û têhetameyîşê şarî ameyî kerdene. Namzedî do bi weçînitişê verî bêrê bewlîkerdene. Şar do bi xo namzedanê xo bewlî bikero. Şarê ma zaf qerardar o ke do qeyûman bişawo.  Şar wazeno ke hinî qeyûman ra bixelisîyo û şaredaranê xo peyser bîgêro. Ma wazenê ke wa her kews hêzdar tewrê nê prosesî bibo.