Qerarnameyanê serekkomarîye ra dima temmuze de zemê KDV û OTVyî zî zêdîyayî. Mîqtarê bacê dermanan 10ê temmuze de se ra 10 zêdîya û coka vayê 14 hezar û 900 dermanî zî zêdîyayî. Binê nê şertan de dermanê kanser û SMA nênê peydakerdene û krîzê dermanan beno giranêr.

Dermanrotêko ke nêwaşt nameyê xo bido, ANFyî rê qisey kerd û dîyar kerd ke bi zêdîyayîşê KDVyî krîzê dermanan beno giranêr. 

Dermanrotî vat: ''Bi mengan o tay dermanî nênê peydakerdene. Krîz beno giranêr. Depoxaneyê dermanan ya nêeşkenê dermanan peyda bikerê çunke şîrketî dermanan nimnenê yan zî seba ke karê înan kêm o dermanan nêdanê. Tay dermanî est ê ke ez bi mengan o pabeyê ci yê. Temmuze de bi taybetî zêdîyayîşê mîqtarê KDVyî ra rewşe hîna bîya giranêr. Ma êlule de zî pabeyê zemêkê neweyî yê. Ganî KDVyê dermanan bikewo se ra 1î. Seba ke bara ma giran nêba ganî dewlete ney raşt bikera.''