Şaristananê Îngilîstanî London, Manchester, Leicester û Edinburgê Skoçya de seba weçînayîşanê Tirkîya û Vakurê Kurdîstanî raydayîş dewam keno. Îngilîstan de bi temamî 127 hezar û 281 weçînitoxî est ê.

Koordînasyonê Weçînayîşî yê Partîya Çep a Keske yê Îngilîstanî pê otobus û mînîbusan şarî beno 14 noqtayanê weçînayîşî yê Londonî.

Zerrîwaz û weçînitoxanê Partîya Çep a Keske derheqê weçînayîşan de ANFyî rê qisey kerd û venga her kesî da ke wa raya xo bido.

Serekê verênî yê Şaredarîya Haringeyî Alî Gul Ozbekî vat: ''Her keso ke zerrîya înan de demokrasî û azadîye est ê wa raya xo bido Partîya Çep a Keske. Mevajê ke pê rayêke se bena. Yew raye do berê zîndanan abikera. Ma erey nêmanê û raya xo bidê. Bêrê ma pîya nê îqtîdarê zalimî bin bivisnê.''

Hemsereka Meclîsê Şarê Kurdî yê Londonî Turkane Budak  vat: ''Ma wazenê Partîya Çep a Keske Îngilîstan de bikerê partîya verêne. Nê weçînayîşî bi kelecanî derbaz benê. Ma zî Îtîfaqê Kede û Azadîye reyde bi coş ê. Bêrê ma hêzê xo bidê nê kelecanî û bi îradeyê xo faşîzmî birijnê.''

Cinîya 75 serre Afşîna ke raya xo daya Partîya Çep a Keske vat: ''Domanî 15ê gulane de bii kêfweşî vaz bidê. Ma do şewdirê 15ê gulane de rojêka newîye rê şîyar bibê.''

Çimdara Partîya Çep a Keske Sîbele Kaçmaz vat: ''Rayêke zî eşkena her çî bivurna. Ma raya weçînitoxan û sindoqan pawenê. Ma bi kelecan ê. Ma do 15ê gulane de rejîmê tekcamêrdî birijnê û hêvîya cuya azade pîl bikerê.''

Ciwan Şîyar Şahînî vat: ''Ez reya verêne raye dana û wazena bi raya xo ameyoxê welatêkê rindêrî awan bikera. Ez sîstemê Tirkîya ra qayîl nîya. Erdogan merdimêko hol nîyo. Ma do ser bikewê.''

Cinîya  ciwane ya dêrsimije Candane Kaya vat: ''Ma bêmabên xebitîyenê. Ma bi coşî raya xo daya. Ma do na dîktatorîye bi rayanê xo bin bivisnê.''

Çimdarê Partîya Çep a Keske Îlhan Powerî vat: ''Ma bi baldarî sindoqan pawenê. Faşîzm û dîktatorîye bi rayanê şarî do bin bikewê.''