Selahattîn Meteyo ke 30 serrî zîndan de mendo, beşê diyînî yê roportajê xo de derheqê zehmetîyanê Tîpê Fyî de qisey kerd.

Selahattîn Meteyî ard ziwan ke înan zîndanan de rojê sey Newroze, Hemleya 15ê Tebaxe û Xoverdayîşê 14ê Temmuze sey festîvale fîraz kerdêne û zîndananê Tipê Fyî de zî seba ke o ruh biciwîyo destê înan ra çi ameyêne kerdêne.

Meteyî vat: ''Tîpê Fyî de ma di koxûşî pîya şayîyêke kerdêne. Mabênê ma de dêsê dergî est bîyî. Di terefan 6 kesî kerdêne. Hetêkî deyîre vatêne hetê bînî tembûr dayêne piro. Ma o ruhê parekerdişî pawitêne. Îdareyî xîret kerdêne ke moral û motîvasyonê ma bişikno la ma nêverdayêne. Bi serran îdareyî payan ser o hûmaritiş ma rê ferz kerd la ma qebul nêkerd. Tîpê Fyî de tim xoverdayîş est bi. Eke xoverdayîş çin bîyêne ma do nêresayêne nê rojan. Zehmetîya ke ma Tîpê Fyî de anta cayêkê bînî de nêante. 

Rixmê zehmetîyan zî ma mabênê xo de tim ercnayîş kerdêne, xo aver berdêne. Ê nêeşkayêne verê perwerde û têkilîya ma bigêrê. Xora perwerde seba ma zaf girîng bi. Dewlete zî no hol zanayêne û tim armanc kerd ke pê Tîpê Fyî perwerdeyê ma asteng bikera. La armancê ci ser nêkewt.''

Meteyî bale ante ser ke tecrîdê vera Rayberê Şarê Kurdî Abdullah Ocalanî îlegal, bêhuqûq û polîtîkaya taybet a. Meteyî vat: ''Rayberîye pê tewir û fikranê xo têkoşînê kurdan aver berd. Dewleta tirke zî hol zanena ke çareserîye Rayber Apo de ya. Dewleta tirke seba ke nê şerî aver bera nêverdena Rayber Apo qisey bikero coka tecrîdî kena giranêr. Dewleta tirke serê tecrîdî ra polîtîkaya xo ya înkar û îmha eşkera kena. A raşte şexsê Rayber Apoyî de ma pêroyî yenê tecrîdkerdene. Ma azad nîyê.''