Ame musayene ke Zîndanê Tîpa Tyî yê Duzce de seba ke hepsîyan lingan ser o hûmaritiş nêdayo, dest û linge înan ameyî kelepçe kerdene, erdî ra kirancîyayî û erzîyayî odeyo singerin. Mudiro ke newe ameyo zî hepsîyan ra vato ‘Şima do hêzê tirkan bivînî’.
Roje çin a ke zîndananê Kurdîstan û Tirkîya ra xeberê îşkence, zext, neheqî û sewbîna nêro. Nê zîndanan ra yewe zî Zîndanê Tîpa Tyî yê Duzce yo.
Goreyê xebera Ajansê Mezopotamya; ame musayene ke no zîndan de 32 hepsîyan seba ke lingan ser o hûmaritiş nêdayo, îşkence dîyo. Hepsîyan vizêr telefon de keyeyê xo ra qala îşkenceyî kerdo. Keyeyanê hepsîyê bi nameyê Selamî Keleş, Mehmet Erbey, Sînan Gur, Vedat Turgut, Vedat Gultekîn, Halîl Kaplan û Şeyhmus Bîlgîçî babete kirişta Komeleya Heqê Merdiman (ÎHD) û Komeleya Hetkarîdayîşê Keyeyê Hepsîyan (TUAY-DER) û hetkarîye waşta.
4 ROJÎ YO KE ÎŞKENCE VÎNENÎ
Dayîka Vedat Gultekînî Azîze Gultekîne va ‘ganî lajê mi 25ê êlule de bigêrayêne, labelê 28ê êlule de gêra û vengê ci zaf xirab ameyêne’. Gultekîne dîyar kerde ke lajê aye înan ra vato tîya de îşkenceyê înan kenî û wina domnaye: “Koguş de ma îşkenceyêko gird vînenî. Ma erdî ra kirancîyenî û erzîyenî odeyanê singerinan. No îşkence 4 rojî yo ke dewam keno. Koguşêk de 10 û koguşo bîn de zî 22 embazê ma estî. Ma heme îşkence vînenî. Ê ma tehdît kerdî û vatî ‘Do dewamê nînan zî bibî’.”
Dayîke Gultekîne wina dewam kerde: “Çira îşkenceyê lajê mi kenî? Îşkence teberê merdimîye yo. Îşkenceyê Asqîyê Filistînî suc o, labelê reyna zî hepsîyan rê yeno kerdene. Seba vindetişê îşkenceyî ganî ma se bikerî? Ma do îdareyê zîndanî gerre bikerî.”
ÎŞKENCEYÊ HEPSÎYÊ NÊWEŞÎ KERD
Dayîka hepsîyê nêweşî Selamî Keleşî, Guzel Keleşe zî va ‘înan destê lajê mi pey ra kelepçe kerdo û ci ser o zextê girdî kerdî’ û wina domnaye: “Goreyê vatişê lajê mi, muduro newe ke ameyo zîndan, îşkenceyê hepsîyan keno û dano hepsîyan ro. Lajê mi nêweş o û nêweşîya ci zî giran a. Vengê ci zaf xirab ameyêne. Ma do domananê xo tena nêverdî. Ma hertim hetê domananê xo de yî.”
‘ŞIMA DO HÊZÊ TIRKAN BIVÎNÎ’
Hepsîyan ra Mehmet Erbeyî zî bi rayîrê keyeyê xo qala îşkenceyî kerdo û wina vato: “Ma erzîyayî hucreyanê yew kesan û dest û lingê ma ameyî kelepçe kerdene. Îşkenceyêko gird esto. Nê îşkenceyî hetê muduro newe ke nameyê ci Kazim o ra yenî kerdene. Mudurî ma tehdît kerd û ma ra va “Şima do hêzê tirkan bivînî, ecdadê şima do hesab bidî, şima do bedel bidî. Ma do gonîya şima birijnî.”
