Komeleyê Komelê Sivîlî yê Sîstemê Înfazê Ceza (CISST) çend rojî verî îstatîstê xo yê peyênî yê serê zîndanan eşkera kerdî. Goreyê ney Tirkîya de 403 zîndanî est ê, kapasîteya nînan 295 hezar û 328 kesan gêna la nînan de 350 hezar û 670 kesî tepişte yê. Komeleya Huqûqnasan a Seba Azadîye (OHD) ra Avûkat Ferdî Yamarî derheqê babete de ANFyî rê qisey kerd.

Yamarî ard ziwan ke nê wextî de ke azadî û heqê bingeyînî ameyê betalkerdene, zor û zehmetîyê tewr giranî zîndanan de yenê dîyene. Yamarî vat: ''Asta tewr kême de zî îhtîyacê heqanê merdiman rê cewab nêdîyeno. Kitab, kovar û rojnameyî nêdîyenê. Bi sebebanê keyfîyan, bi bahaneyan zîndanan de destûr nêdîyeno cuya komelkî û şexsîye.''

Yamarî dîyar kerd ke Tirkîya de kapasîteya zîndanan full bîya, her ca zîndanê bi tîpanê neweyan înşa benê û vat: ''Zîndanê neweyî zî cade debenê. Seke dargehê mehkemeyanê ceza û sulhî û mutahîtê zîndanan kewtê musabeqa.

Xeylêk zîndanan de cayanê hemparan de ranzayî ronîyayê û tepişteyî neçare manenê ke erdî ser ra rakewê. Tayê tepişteyî bi hawayêkê dorkerdişî kewenê ra. Coka nêweşîyî zî qewimîyenê. Nê sîstemî merdimî bi hawayêkê keyfî tepişîyenê.''