Merkezê Kulturî yê Mezopotamya (MKM) bi wesîleya serrgêra ronayîşê xo Merkezê Ramojnayîşî yê Yahya Kemal Beyatliyî yê Kuçukmece de vizêr konserêk organîze kerd. Qeymeqamîya Kuçukçekmece konser qedexe kerd.

Badê qerarê qedexekerdişî MKMyî bi eşkerayîyêke da zaneyene ke ê nê qerarî nas nêkenê û vera qedexekerdişî  banê DEM Partî yê Bagcilar û Sancaktepe de di konserî organîze kerdî.

Komîsyonê Ziwan, Kultur û Hunerî yê Partîya Demokrasîyî û Têdûştîye ya Şaran (DEM Partî) bi eşkerayîyêke qedexeyê vera kurdkî şermezar kerd.

Eşkerayîya ke bi kirdkî (zazakî) ameye dayene wina ya:

''Qeymeqamîya Kuçukçekmeceyî ya Stenbolî konserê Merkezê Kulturî yê Mezopotamyayî qedexe kerdo û Trabzonî de zî 4 karkeranê Kurdan rê hêrîş ameyo kerdene. Pêroyê dinyaye de yeno zanayîş ke ziwan rûmetê û bîyayîşê şarêkî yo. Hewna yeno zanayîş ke Tirkîyaye de ziwanê dîyin yo tewr vêşî yeno qisekerdiş ziwanê Kurdkî yo. Nê hêrişê faşîzmî dîyar kenê hemverê zimanê Kurdkî de dişmenîyêk est a. Ganî goreyê qanûn prensîbanê netewî û mîyannetewî ziwanê Kurdkî bi qanûnan bêro pawitiş û xizmetê hikûmî de zî Kurdkî rê ca bêro dayîş. Ma sey Komîsyonê Ziwan, Kultur û Hunerî yê Partîya DEM’î nê hêrîşan şermezar kenê û nêzdîbîyayîşê faşîzmî zî qebul nêkenê. Ziwanê me rûmetê ma yo û ma do her tim ziwanê xo bipawê. ''