Bîlançoyê Covid-19î yo ke peynîya menga kanûne de şaristanê Wuhanî yê eylaetê Hubeyî yê Çînî de vejîya werte beno giran. Wuhan de 132 kesê bînî merdî. Bi nê hawayî hûmara qurbanan resaye 2 hezar û 13 kesan.

Goreyê selahîyetdaran 2 hezar kesê bînî zî bi vîrusê Korona kewtî û hûmara nêweşanê Korona 74 hezar kesî derbaz kerdî.  Welatanê teberî Çînî de heta nika 900 nêweşê Korona ameyî tesbîtkerdene û 5 kesî zî merdî.

Eşkerayîya peyêne ya Rêxistina Weşîye Dinya (WHO) de ame eşkerakerdene ke hûmara mergan ê vîrusê Korona mîyanê ciwanan de zaf tay a, la mîyanê merdimanê kalan de zêde ya. 

Hetê bînî ra heta nika nêame tesbîtkerdene ke domanê ke 10 serrî ra qijêr ê vîrusî ra merdî. Rêjê mergî mîyanê cinîyan de se ra 1.7 yo û mîyanê camêrdan de zî rêjê mergî se ra 2.8 yo.