Dewleta Îranî aşma sibate de ef vetbi. Hetê selahîyetdaranê Îranî ra  derheqê kesanê ke efî ra îstifade kenê de zanayîş ame dayene.

Goreyê xebera ISNA heta nika 82 hezar kesî kewtî efî vera. Înan ra 22 hezar kesî çalakwanê serewedaritişî yê ke badê kiştişê Jîna Emînî dîya destpêkerdene.

Goreyê zanayîşanê ke selahîyetdaran pare kerdî tepişteyanê bînan ra do nizdê 60 hezar kesî bêrê serbest veradayene û bi efê peyênî ceyza 34 hezar kesan zî ameye wardayene.

Cinîya ciwan a kurde Jîna Emînî 16ê êlule de Tahran de hetê polîsanê ehleqî ra ameye qetilkerdene. Naye ser şaranê Îran û Rojhelatê Kurdîtanî vera rejîmî serewedarit. Goreyê Rêxitina Heqanê Merdiman a Îranî 64ê înan domanî, 39ê înan cinîyî tewr tay 488 kesî nê serewedaritişî de ameyî qetilkerdene. Yeno texmînkerdene ke bîlonçoya raşte dahîne gird a. Bi des hezaran kesî zî ameyî tepiştene.

Wextê nê serewedaritişî ke serkêşîya cinîyan de yeno rayraberdene de aşma teşrîna peyêne ra nata na rey mektebê wendekaranê kênayan bîyî hedefê hêrişanê bigazî.  Goreyê selahîyetdaran tewr tay 13 hezar wendekarî binê tesîrê gazan de mendê.