Îran 21ê sibate de seba weçînayîşê 290 parlamenteran weçînayîşî do bikero. Kampanya seba weçînayîşê pêroyî 13ê sibate de dest pêkerd. 21ê sibate de zî mîyanê 7 hezar û 148 namzetan ra ke destûrê rejîmî girewt 290 parlamenterî do bêrê weçînayene.

Konseya Muxafizanê Şorişî ya ke bi tesdîqkerdişê namzetan wezîfedar a, namzetîya 7 hezar û 296 kesan red kerde. Konseya Muxafizan 12 endaman ra yena meydan. Înan ra 6 kesî hetê rayberê dînî ra yenê tayînkerdene. Ê 6 kesê bînî zî hetê şefê erkê edlîyî ra yenê eşkerakerdene. Şefê erkê edlîyî zî hetê rayberê dînî ra yeno tayînkerdene. Peynîya peyêne de temamîya 12 endaman ê kes ê ke pabesteyê rayberê dînî yê. Zafînê kesanê ke namzetîya înan ameye batalkerdene koalîsyonê hukmatî ra yenê ke sey 'nerm' û reformwaz'ê muxafazakarî yenê naskerdene.

Weçînayîşê 40 serranê peyênan ê rejîmê teokratîkî pêro bi hawayêkê şikî qedîyayî. Her rey ame parekerdene ke tewrbîyayîşê weçînayîşan zêde yo û wekîlî zî hetê şarî ra ameyî weçînayene. Weçînayîşê na serre zî binê krîzê benzînî û alozîya bi DYA de yenê kerdene. Mabênê sîstemî de zî astêka cidîye de nakokîye esta. Serekkomar Hasan Rûhanîyî vera têgêrayîşê Konseya Muxafizan nêrazîbîyayîşê xo mojnabi ke namzetîya zaf kesan batal kerde û venga şarî da ke bi hawayêkê xurtî tewrê weçînayîşan bibo. Hasan Rûhanî û koalîsyonê ci seba ke boykotî ra qerqilîyenê vengdayîşê tewrbîyayîşê weçînayîşan kenê.

Labelê hem krîzî ra hem zî nêbîyayîşê weçînayîşê demokratîkî ra şar nêwazeno şoro sindoqan. Weçînayîşan ra verî zî boykot tim rojdem de bi. Komeleya Azade û Demokratîke ya Rojhelatê Kurdîstanî (KODAR) û Partîya Cuya Azade ya Kurdîstanî (PJAK) 9ê sibate de eşkerayîyêka hempare weşanaye û da zanayene ke înan bira boykotkerdişê weçînayîşî girewte. Her di têgêrayîşan zî eşkera kerd ke weçînayîşê Îranî antî-demokratîk û bişeklî yê û nê weçînayîşî cewab nêdanê waştişanê şarî. Eşkerayîye de ame vatene ke meclîso newe zî do bi nê hawayî bişeklî bibo û waştişanê demokratîkan û meşrûyan red bikero. Mucahîdanê Şarî ke komêka muxalîfe ya, vengdayîşê boykotkerdişî kerd. Sereka Konseya Xoverdayîşê Neteweyî ya Îranî Meryem Racavî ke sey temsîlkara sîyasîyî ya surgune ya Mucahîtanê Şarî yena naskerdene da eşnawitene ke boykotkerdişê weçînayîşî ''wezîfeyêko welatperwerîye'' yo.