Wezaretê Weşîye yê Îranî vizêr şan eşkerayîye daye û pare kerd ke rojêke de 49 kesî vîrusê Korona ra merdî û 6566 kesî zî pê Korona kewtî.

Serekê Beşê Îrtîbatî û Têkilîya Pêroyî yê Wezaretê Weşîye Kîyanuş Cîhanpurî kombîyayîşê çapemenîye de da zanayene ke hûmara kesanê ke Korona ra merdî bîye 194. Cîhanpurî îfade kerd ke 24 saetanê peyênan de 49 kesî Korona ra merdî, 2134 kesî zî nêweşîye ra pakî bîyî.

Goreyê hûmarayanê fermîyan rewşa nêweşan eyaletan de wina ya:  Tehran 1805, Qom 685, Gîlan 496, Esfehan 564, Elborz 307, Mazenderan 620, Merkezî 335, Qezvîn 207, Semnan 175, Golistan 175, Xorasan Rezewî 154, Fars 104, Loristan 144, Tebrîz 107, Xozestan 69, Yezd 87, Zencan 53, Sine 63, Erdebil 50, Kirmaşan 33, Kirman 41, Hemadan 60, Sistan û Beluçistan 34, Hormozgan 35, Xorasana Başûr 44, Xorasana Bakur 24, Çarmehal û Bextiyarî 21, Îlam 15, Urmiye 40, Kohgîluye û BoyerEhemad 9 û Bûşehir 10."

Korona ra sere de parlamento pêro dezgehê Îranî girewte yê. Seba ke hûmara mergan bîye zêdêr parlamento do ewro bêra pêser û derheqê tebdîran de munaqeşe bikera.

Serekê Komîsyonê Weşîye yê Meclîsê Îranî Muhammed Huseyîn Kurbanîyî ard ziwan ke vîrusê Korona ra semed Meclîsê Şûraya Îslamî do kombîyayîşêkê îstîsnayî bikero. Kurbanîyî da eşnawitene ke zaf parlamenterî û Wezîrê Weşîye Saît Nemekî do tewrê nê kombîyayîşî bibê.