Îran de protesto: Sersefîro îngilîz ame destbendkerdene

Sersefîrê Îngilîztanî yê Îranî Rob Macaire bi bahaneya ke wendekarê zanîngehî seba çalakîyan teşwîq kerdî ame destbendkerdene.

Goreyê ajansê xeberan ê Tasnîmî Sersefîrê Îngilîztanî 11ê çeleyî de bi bahaneya ke wendekarê Zanîngehê Amîr Kabîrî yê Tehranî seba çalakîyan teşwîq kerdî ame destbendkerdene û çend seatan ra dima ame veradene.

Wezîrê Karanê Teberî yê Îngilîztanî Dominic Raabî eşkerayîyêka nuştekîye daye û vat: "Destbendkerdişê sersefîrê ma yê Tehranî bi hawayêkê eşkera binpaykerdişê huqûqê mîyanneteweyî yo.

Raabî vat: "Hukmatê Îranî verê prosesê birêke de yo; ya bi tecrîdê sîyasîyî û ekonomîkî statuyê patya dewam bikero yan zî xo bi rayîrê dîplomatîkî angaje bikerê."

Bi seyan wendekarî Tehran de seba yadkerdişê merdimanê ke qezaya teyara de 8ê çeleyî de wefat kerd Zanîngehê Amîr Kabîrî de kom bîyî. Na çalakîye vurîyaye bîye çalakîya hêrsî ya vera îqtîdarî. Çalakîkeran sloganê ''zurker'' vat û waşt ke kesê ke bîyî semedê qezayî bêrê hukmkerdene. Goreyê ajansa xeberan ê Farsî wendekaran afîşêkê Qasim Silêmanîyî vêşna ke 3ê çeleyî de hetê DYA ra ame kiştene.

Trumpî paştî da çalakîkeran

Serekê DYA Donald Trumpî zî mesajêkê paştdayîşî erşawit û pare kerd ke ê şarê Îranî reyde yê û çalakîyanê neweyan nêzdî ra teqîb kenê.

Trumpî twîtter ser o vat: "Şarê Îranî y biçêr o ke wextêkê dergî ra nata dej anceno, serekîya xo ra nata ma hetê şima de yê û ma do hetê şima de bibê. Ma çalakîyanê şima nêzdî ra teqîb kenê û no zî na çêrîye hêz dana ma."