Dima ke 16ê êlule de cinîya kurde Jîna Emînî amebî qetilkerdene vera rejîmê dewleta Îranî çalakîyanê şarî dest pêkerd û çalakîyî 73 rojî yo dewam kenê.

28ê teşrîna peyêne de şaristananê Sine û Abdananî yê Rojhelatê Kurdîstanî de ciwanî vejîyayî waran. Zanîngehanê Rojhelatê Kurdîstanî de bi taybetî Sine de zî çalakîyê wendekaran dewam kenê.

Hêzanê dewleta Îranî vera çalakîkeran bi taybetî Rojhelatê Kurdîstanî de kerdişê sey tepiştişî, remnayîş, tehdîtkerdiş û şîdetî zêdînayî la rixmê ney zî çalakîyî dewam kenê.

Dîya zanayene ke Sine de heman keyeyî ra 4 kesê bi nameyanê Afaq, Şemsê, Parwîz û Xesrewî tepişîyayê. Mehabad de Şoreş Niknamo ke çalakîyan de amebi qetilkerdene, dewa Qelauxe de ame definkerdene.

Îran de bi taybetî Tehran de zî çalakîyî dewam kenê.

Şaristanê Kirmaşanî yê Rojhelatê Kurdîstanî de û şaristananê Îranî Îsfehan, Şîraz, Kaşan û Bender Ebasî de zî grevo pêroyî dewam keno.

4 sendîkayan zî paştî daye çalakîyan û waşt ke cade tepişteyî vera bidîyê û hêrişê vera çalakîkeran vinderê.

Goreyê bîlançoya Rêxistina Heqanê Merdiman a Îranî 16ê êlule ra nata tewr tay 416 kesê ke 51ê ci doman ê ameyê qetilkerdene.

Goreyê çimeyanê bînan çalakîyî heta nika 277 şaristanan de vila bîyê û heta nika tewr tay 600 kesî ameyê qetilkerdene. Keyepelê muxalîfî zî lîsteyêka nameyanê 541 kesanê ke ameyê qetilkerdene weşanaye.