Artêşa Îsraîlî eşkera kerd ke Îranî bi xeylêk droneyanê çekdaran hêrişê Îsraîlî kerd. Îranî vat droneyê çekdarî do bi saetanî ra dima biresê Îsraîlî û nuqtayê ke binê tehdît de yê do nê cayan de sîrenî bêrê cinayene.

Televîzyonê dewlete yê KANNî yê Îsraîlî eşkera kerd ke Îranî bi droneyanê çekdaran hêrişê vera Îsraîlî da destpêkerdene. Reyna televîyonê Kanal 12 ê Îsraîlî zî vat bi desan droneyê çekdarî yê Îranî rayîr de yê û do bi saetan cuwa pê biresê ca.

Muxabîrê sîteyê xeberan ê Axiosî yê Amerîka rojnamegero îsraîli Barak Ravîdî vat ey selahîyetdaranê Amerîka û Îsralîlî ra zanayîş girewto ke Îranî bi desan droneyê çekdarî şawitî Îsraîlî.

Serekkomarê Îsraîlî Binyamin Netanyahuyî ard ziwan sîstemê pawitişî yê welatî ameyo aktîfkerdene û vat: ''Artêşa ma hazir a. Kam ke zirar bido ma, ma zî do zirar bidê ey. Ma do vera her qeyde tehdîtan xo bipawê.''

Eşkerayîya ke hetê Muhafizanê Şorişî yê Îranî ra ameye dayene de ame vatene ke  bi desan droneyê çekdarî şawîyayî herra Îsraîlî.

Qesra Sipî ard ziwan ke Îranî vera Îsraîlî şer dayo destpêkerdene û vat, ''Ma do paştî bidê Îsraîlî.''

Hetê bînî ra Îsraîlî de semedê asayîşî di rojî mabên dîya mekteban, hezar kesanî ra zafêr do şar nêro têhet,warê karî de astenkerdişî ameyî.

Urdunî zî rîyê hêrişê Îranî yê vera Îsraîlî do halê îstîsnayî îlan kerd û warê teyarayan sey demdemî heme teyarayan rê qedexe kerd.

Wezîrê Resnayîşî yê Îraqî Rezzak es-Sadaviyî ke ajansê xeberan ê fermî yê INA rê qisey kerd, vat înan warê teyarayan heme firnayîşan rê qefilnayo.