Şerê Îsraîl û Hamasî 20 rojî yo dewam keno. Artêşa Îsraîlî pare kerd ke vizêr şewe seba 'operasyonanê dîyarkerdeyan' pê tankan kewta vakurê Şerîdê Gazze.

Artêşa Îsraîlî da zanayene ke leşkerî operasyonî ra dima 'warî ra şîyê.'

Serekwezîrê Îsraîlî Bunyamîn Netanyahuyî şanê çarşemeyî eşkerayîyêke daye û dîyar kerd ke seba operasyonêkê vera Hamasî yê Şerîdê Gazze amadekarîye yena kerdene.

Îsraîl 7ê teşrîna verêne hêrişê Hamasî ra nata Gazze dano bombayan ver. Nê 19 rojan de netîceya bombardumananê Îsraîlî de tewr tay 6 hezar û 500 filîstînijî ameyî kiştene. Goreyê selahîyetdaranê Îsraîlî hêrişanê Hamasî de tewr tay 1400 îsrailîjî ameyê kiştene.

Artêşa Îsraîlî pê fuzeyan hêrişê Lubnanî zî kerd. 7ê teşrîna verêne ra nata sînorê Lubnanî de mabênê Hîzbullahê Lubnanî û Îsraîlî de her roje şer qewimîyeno.

Goreyê AFPyî Lubnan de çar sivîlî, 39 şerwanê Hîzbullahî û 9 endamê Hîzbullahî bi temamî 52 kesî merdê.