Roketan ra yê ke roja şemeyî ameybî eştene serekê Partîya 'Kewe-Sipî' Benny Gantz wextê kampanyaya weçînayîşî de neçare mendbi ke xo dekera cayêkê biasayîşî. Gantzî weçînayîşê 2ê adare de raqîbo verên ê Serewezîr Bunyamîn Netanyahu yo. Gantz zî sey Netanyahu terefgîrê planê haştîye yê DYA yo.

Roje ra ke no plan ame eşkerakerdene xeta Gazze ra her roje ver bi başûrê Îsraîlî roket, obus û madeyê teqaberî yenê eştene. Îsraîl zî nînan bahane keno û bombarduman keno.

Goreyê eşkerayîya artêşa Îsraîlî şewa yewşemeyî de teyara û helîkopteranê Îsraîlî  da 'terorîstanê Hamasî yê xeta şerîdê Gazze' ro.

Hamasî pare kerd ke hêriş de zerarêk nêresa hêzanê înan ser.

Wezaretê Pawitişî yê Îsraîlî zî teslîmatê çîmento yê seba herême vindertî. Wezaretî da zanayene ke înan destûrê bazirganîye yê nêzdîyê 500 heban zî vindarnayî.

Fîlîstînî planê haştîye yê DYA red kerdbi. Goreyê nê planî herêmê hîrayî yê Şerîaya Rojawanî yê ke Îsraîlî 1967 de îşxal kerdî zî do bêrê îlhakkerdene.

Mabênê Îsraîlî û Hamasî de adirbirnayîşêk esto. Serra 2008î ra nata xeta Gazze de mabênê Îsraîlî û Hamasî de hîrê şerî qewimîyayî.