Goreyê bîlançoya peyêne ya Wezîrîya Weşîye ya Gazze 7ê teşrîna verêne ra nata hêrişanê Îsraîlî de qasê 23 hezar kesî ameyê kiştene û 58 hezar û 166 kesî zî birîndar bîyê.

Bombardumanan ra pêro taxê Gazze rijîyayî û se ra 85ê nufus wareyanê xo ra bi.

Roja yewşemeyî di muxabîrê Kanalê El Cezîre Refah de hêrişêk de kişîyayî. Goreyê Komîteya Pawitişê Rojnamegeran 7ê teşrîna verêne ra nata şerê mabênê Îsraîl û Hamasî de tewr tay 77 rojnamegerî û xebatkarê medya kişîyayê.

Rojawanê Şerîa yo ke 1967î ra nata binê îşxalê Îsraîlî de ya tede şîde resayo asta tewr berze. Goreyê Wezîrîya Weşîye ya Ramallahî hêrişanê Îsraîlî de Cenîn de 8 filîstînijî kişîyayî.

Şanê yewşemeyî polîsanê Îsraîlî sereraşt kerd ke nêzdîyê Qudusî de netîceya hêrişanê înan de domanêk kişîyayo.

Dezgehanê hetkarîya merdiman ê mîyanneteweyîyan dîyar ker ke Şerîdê Gazze de nêweşxaneyê peyênî zî teberê xizmetî de mendê.

Rêxistina Weşîye ya Dinya (WHO) îfade kerd ke Nêweşxaneyê El Aksa ra 600 nêweşî 'giranbîyayîşê şerî' ra bîna ra ameyê vetene. Personelanê Doktoranê Sînornenasan zî hêrişê vera servîsê ciewnîyayîşê giranî ra dima pêro nêweşxaneyî teriknayî.

Wina pawîyeno ke Wezîrê Karanê Teberî yê Amerîka Antony Blinken şanê yewşemeyî Îsraîlî zîyaret bikero. Blinken dima do şoro Emîrîyanê Ereban ê Yewbîyayeyan û Erebîstana Suûdî.