Roja yewşemeyî mabênê hêzanê Trablusî yê ke Anqara paşt dana ci û hêzanê Halîfe Hafterî yê ke rojhelatê welatî kontrol kenê şer newe ra qewimîya.

Hukmatê Trablusî bi eşkerayîyêka nuştekîye pare kerd ke şer dest pêkerd. Goreyê hukmatê Trablusî hêzê Hafterî ver bi şaristanê Ebû Kurayne kewtî têgêrayîşî. Ame îfadekerdene ke no têgêrayîş seba operasyonê ver bi şaristanê Mîsrata yo ke şaristanêkê lîmanî yo û bi 120 kîlometreyan dûr o.

Analîst Jalel Harşawîyî Associated Press reyde qisey kerd û ard ziwan ke Halîfe Hafterî cepheyêkê taktîkî akerd û rewşa nikayêne de wazeno milîsanê mîsratayîj ê ke nika hukmatê Trablusî pawenê ver bi Mîsrata biancê. Bi nê hawayî adirbirnayîşo ke 12ê çeleyî de rayberîya Anqara û Moskova de ame kerdene û 19ê çeleyî ra dima Berlin de ame qebulkerdene pratîk de qedîya.

Tirkîya Hema zî Çekan Erşawena Lîbya

Serekkomarê Tirkîya Recep Tayyîp Erdogan roja yewşemeyî bi eşkerayîyêke îdîa kerd ke seba şerê Lîbya çareserîyêka leşkerî çin a. Yeno vatene ke dewleta tirke hema zî hêzanê paramîîteran û çekanê giranan erşawena Lîbya.

Mîsyonê Lîbya yê Neteweyanê Yewbîyayeyan (MANUL) nêrazîbîyayîşê xo mojna ke her çiqas sozê ke konferansê Berlinî de ameyî dayene zî amabargoyê çekan ê vera Lîbya ame binpaykerdene. MANULî nameyê welatan eşkera nêkerdî la vat: ''Seba ke welatê ke tewrê konferansê Berlinî bîyî şerwananê xerîban, çekan, cebilxane û sîstemanê teknolojîkan erşawenê Lîbya, adirbirnayîş rê gef wanenê."

Neteweyanê Yewbîyayeyan da zanayene ke mabênê 10 rojan de her di terefan zî seba ke çekan, wesayîtanê zirxînan, şêwirmendan û şerwanan bigêrê meydananê teyarayan ê rojhelat û rojawanî de perayîşan kenê. MANULî ard ziwan ke binpaykerdiş rîskêk virazeno ke welat bivisno mîyanê şerêkê giranêrî.

Hetê bînî ra Lîbya de 18ê çeleyî ra nata blokekeridşê termînalanê petrolî yê bingeyînan ra semedî se ra 75 berardişê petrolî kêm bî.

Hêzê Hafterî yê je rojhelatê welatî kontrol kenê nîsana 2019î ra nata seba kontrolkerdişê paytext Trablusî operasyonan kenê.