Rêxistina Efû ya Mîyanneteweyî (Amnesty International) vizêr bi beyanatêkî pare kerd ke hûmara kesanê ke nawnayîşanê Îranî û Rojhelatê Kurdîstanî de ameyî kiştene zêde bena.

Rêxistine çend dîmenê nawnayîşan mojnayî û vat: "Nê dîmenî mojnenê ke karmendê rejîmê Îranî bizanayîşî çekanê rastikênan mesafeyêkê nêzdî ra vera çalakîkeran xebitnenî."

Rêxistina Efû qetî kerd ke hûmara kişteyan 143 kesan ra zêdêr a û wina dewam kerd: "Hêzê asayîşî yê rejîmê Îranî mesafeyêkê nêzdî ra guleyan nanê çalakîkeran û kesanê ke remenê."

Îdarekarê Rêxistina Efû Philip Lutterî derheqê rewşe de wina vat: "Bîlançoyê kişteyan her ke şono beno giran. No zî mojneno ke zulm û bêrehmîya selahîyetdaranê Îranî ya vera çalakîkeran mesajê gefî ya. "

Rêxistina Efû vist vîrî ke hêzê asayîşî, pasdarî, polîsê sivîlî û hêzê Besîcî seba lînçkerdişê çalakîkeran bîyî hempar.

Rêxistina Efû peynî de vat: "Karmendê rejîmî cenazeyan nêdanê keyeyanê ci û cenazeyan cayanê bînan de defn kenê. La karmendî pereyê guleyanê ke pê çalakîkerî kiştî keyeyanê çalakîkeran ra arê danê."

Gore beyanatî hûmara kişteyan ê her eyaletî:

Eyaletê Xûzêstanî: 40 kesî

Eyaletî Kirmaşanî: 34 kesî

Eyaletê Tehranî: 20 kesî

Eyaletê Farsî: 15 kesî

Eyaletê Sine: 12 kesî

Eyaletê Ûrmîye: 4 kesî

Eyaletê Elborzî: 9 kesî

Eyaletî Êsfehanî: 7 kesî

Eyaletê Kêrmanî: Kesêk

Eyaletê Azerbaycanî: Kesêk