Wekîla Sosyalîste Amînehe Kakabaveh sucê dewleta tirke yê wextê îşxalê Rojawanî û tedaya ci ya vera HDPyî ardî rojdemê Parlamentoyê Swêdî.

Persnameyê ''Şerê hêrişî yê Tirkîya yê vera Rojawanî'' de sucê merdimîye û sucê şerî yê dewleta tirke û cerganê ci bi hawayêkê hîrayî ameyî qalkerdene.

Kakabavehe Wezaretê Karanê Teberî ra waşt ke seba ke hêrişê dewleta tirke yê vera Rojawanî bêrê vindertene çimdarî bêrê erşawitene bi Sûrîye û Neteweyê Yewbîyayeyî û Yewîya Ewrepa xîret bikerê ke warê hewayî yê Rojawanî perayîşî ra bêro qedexekerdene.

Kakabevehe persnameyê ''Tirkîya de Tepişteyanê Sîyasîyan'' de zî tepiştişê sîyasetmedaranê kurdan û îşxalê şaredarîyanê kurdan ardî rojdem.

Wezîra Karanê Teberî Lînde ard ziwan ke hêrişê dewleta tirke înan kenê biqesawet û vat: "Ganî vera hêrişanê Tirkîya êzidîyî, sûryanîyî, kurdî bêrê pawitene. Ma bi hawayêkê xurtî wazenê ke Tirkîya xo tepîya bianca. Ganî sucê ke Tirkîya Rojawan de kerdî bêrê cigêrayene û Tirkîya bêrê hukmkerdene.''

Lînde derheqê rewşa HDPyî de zî wina vat: "Ganî destûr bêro dayene ke kesê ke ameyî weçînayene kar û gureyê xo bikerê."

Lînde heman wextî de vat ke ê tim  na tedaya vera muxalefet, îdarekaranê HDPyî, çapemenîye, akademîsyanan û rêxistinanê komelî anê rojdemê parlamentoyê Yewîya Ewropa û dîplomatê swêdijî tewrê mehkemeyanê muxalîfan û wekîlanê ê tepişteyan.