Wan de çalakîyê protestoyî yê ke vera destsernayîşê Şaredarîya Bajarê Pîlî ya Wanî dest pê kerd, rixmê zext û şîdetê polîsan dewam kenê.

Verê Banê DBPyî ra ver bi Kuçeyê Cumhurîyetî rayraşîyayîş ame kerdene. Hemserekê Pêroyî yê DEM Partî Tuncer Bakirhan, Tulaye Hatimogullari, Hemsereka Pêroyî ya DBPyî Çîgdeme Kiliçgun Uçar zî tewrê rayraşîyayîşî bîyî.  Dormeyî ra şarî zî bi çapik û sloganan paştî dayî. Polîsan hêrişê şarî kerd û xeylê kesî destbend kerdî. 

Tuncer Bakirhanî qiseykerdişê xo de vera hêrişê polîsan hêrsê xo ard ziwan û vat: ''Bajaranê dormeyî ra polîsî kiriştî tîya. Şima eşkenê vajê Wan bajarêkê nê welatî yo? No îşxal nîyo çîyo. Dîmenê winayên yewna cayê Tirkîya de est ê? Nêverdenê ma şarê xo reyde bêrê têhet. Verê çimanê ma de ciwanî destbend kerdî.  Şarê Wanî merkez û heme qezayan de wextê vîjnayîşî de cewabo tewr pîl da şima. Şarê Wanî vat 'eke şima Bekir Kayayî bigîrê, dest şaredarîya ma ser nê ma zî sindoq de bi 14-0 şima ra hesab persenê.' Şima herinda nêyî ra dersvetişî de hîrê dewrî yo ke vera îradayê şarê kurdî qeyûm tayîn kenê. Şima nêeşkenê nê şarî têkoşîn û dewaya ci ra raqilnê. Wan warê xoverdayoxan o.  Wan bin nêkewno, peyser game nêerzeno û verê qeyûman milê xo çewt nêkeno. Şarê Wanî mende yo. Şima do şirê, qeyûmê şima ke dizdîye kenê do şirê.

Birêz Ocalan 26 serrî yo  semedê haştîye kede dano. Nizdî ra do xerîtaya rayîrî eşkera bikero. Şima bi nê xespê îradeyî senî mesele çareser kenê? Şima dişmenîya vera kurdan senî eşkenê biresê haştîye. Abdullah Ocalanî semedê çareserî xover dano, ê qeyûm tayîn kenê ke bi dîzdîye îradeyê şarî xesp bikerê.  Eke şima dişmenîya kurdan kenê nê eşkera vejê.  O qeyûm do şiro, şaredarî ya ma ya. Ê ke dizdîye kenê û talîmat danê do şirê. Ê ke talîmat danê hukmî do şirê. Qerar bidê şima çareserîya demokratîke, mezakere û dîyalog wazenê, ya dişmenîya kurdan? Cewabê nê bidê.''