Hêzanê hewayî yê Îsraîlî şewdirê sêşemeyî eşkerayîye daye çapemenîye û vat ke hêrişê nînan ê vera qerargehê servîsê îstîxbaratî yê Hîzbullahî de Fermandarê Qerargehê Merkezî yê Hîzbullahî  kişîyayo.

Têgêrayîşê Hamasî yê Filîstînî dîyar kerd ke şerwananê nînan ra Muhammed Îbrahîm Halef şanê dişemeyî Tîr de kişîyayo.

Hîzbullahî pare kerd ke nînan bi fuzeyan dayo qerargehê îstîxbaratî yê Îsraîlî û Tiberiasî.

Serekwezîrê Îsraîlî Bunyamin Netanyahuyî roja dişemeyî pare kerd ke têkoşînê vera Hamas û Lubnanî nînan rê 'erkêko pîroz' o û ê nê tekoşînî rê dewam bikerê.

Goreyê CNNyî Amerîka plan kena ke operasyonanê Îsraîlî yê vera Lubnanî sînordar bikerê.

Selahîyetdaranê Amerîka îdîa kerd ke tesîrê Amerîka Îsraîlî ser de tay o û Serekê Amerîka Joe Biden qerqilîyeno ke şerê vera Lubnanî pîlêr bibo.