Cerganê DAÎŞî hêrişê Dîyala û Xaneqînî kerd

Cerganê DAÎŞî  Xaneqînî û Celavlaya Dîyala yê Iraqî de hêrişê hêzanê Haşdî Şabî kerd. Hêrişî de 4 milîsê Haşdî Şabîyî merdî û zaf milîsî zî birîndar bîyî.

Wextanê peyênan de Kerkûk, Xurmatû, Dîyala, Xaneqîn, Celavla û Germîyan de ke mabênê Iraqî û Başûrê Kurdîstanî de yê, têgêrayîşê DAÎŞî zêde bîyî.

DAÎŞî mîyanê hewteyê peyênî de zaf herêman de hêrişê hêzanê Iraqî û milîsanê Haşdî Şabîyî kerd.

Cerganê DAÎŞî çend roje verê cû hêrişê hêzanê asayîşî yê dewa Kuleco ya Germîyan kerd. Şewa yewşemeyî zî Xaneqîn û Celavla de hêrişê hêzanê Haşdî Şabîyî kerd.

Herêma Neftxanî ya başûrê Xaneqînî de 4 endamê Haşdî Şabîyî merdî, zaf endamê Haşdî Şabîyî zî birîndar bîyî. Heman saete de Celavla de zî hêrişêk ame kerdene.

Hêrişanê mabênê hêzanê Iraqî û cerganê DAÎŞî ra dima şer vejîya. Şer heta şewe dewam kerd. Derheqê merde û birîndaran de zanayîşî nêameyî girewtene.