Rojnameyê Îngilîztanî The Guardianî pare kerd ke dewleta tirke seba ke cergî şorê Lîbya hemwelatîya tirke û 2 hezar dolarî dana cergan. Radyoyê RFI zî bale ante ser ke cergî bi nasnameyê tirkan Lîbya de gêrenê.
Goreyê xebera The Guardianî dewleta tirke seba ke cergan bierşawa Lîbya 2 hezar dolarî û hemwelatîya tirke dana înan. Rojnameyî xebera xo de zaf çimeyî sey îsbat mojnayî. Goreyê xebere Tirkîya ra 2 hezar sûrîyeyîjî ameyî erşawitene bi Trablus. Ame parekerdene ke nêzdî de reyna tay sûrîyeyîjî do bêrê erşawitene bi Lîbya.
Rojnameyî da zanayene ke 14ê kanûne de noqtaya sînorî ya leşkerî ya Hawar Kîlîsî ra 300 cergan û 29ê kanûne de zî 350 cergan Sûrîye terikna, 5ê çeleyê 2020î de zî 1350 cergî derbazê Tirkîya bîyî. Nê cergî hetê dewleta tirke ra ameyî perwerdekerdene ke bierşawîyê Lîbya.
The Guardianî eşkera kerd ke cergan hukmatê Yewîya Neteweyî ya Trablusî reyde seba şeş mengan peymane îmza kerde ke peymane hetê Tirkîya ra nêameye kerdene. Goreyê naye maeşo ke cergan ra yeno dayene qasê 20 qatî bî zêdêr. Goreyê peymane halê mergî definî de zî berpirsîyarîye Tirkîya milî de ya.
RFI: Bi nasnameyanê tirkan gêrenê
Radyoyê RFI yê Fransa zî kifş kerd ke Lîbya de tay leşkerê bipereyî wayîrê hemwelatîya tirkîe yê û tay zî seba hemwelatîye 6 mengî yo ke pawenê.
Dîmenêk de ke torra komelkî de ame weşanayane cerganê Sûrîye ra yewo ke bi nasnameyê Tirkîya gêreno aseno. RFI îfade kerd ke dîmen şaristanê Dîlokî de ame girewtene. Ame parekerdene ke cergî Dîlokî ra derbazê Lîbya benê.
