Bi fermanê Serekkomarê Tirkîya Recep Tayyîp Erdogan Tirkîya cergê xo yê Sûrîye erşawitêne Lîbya. Seba paştdayîşê hukmatê Trablusî Tirkîya cergê Efrînî erşawitbî Lîbya.

Yeno parekerdene ke hûmara nê cergan 2400 a û nê cergî çekê xo caverdenê û remenê. Keyeyê Çimdarîye yê Heqanê Merdiman ê Sûrîye yê London pare kerd ke beşêko zêde yê cergan seba ke xo biresnê welatanê Yewîya Ewropa remayî Cezayîr. Ame parekerdene ke 17 cergan xo resna erdê Yewîya Ewropa û waştişê multecîtîye yê Îtalya kerd. Keyeyê Çimdarîye da zanayene ke înan na xebere keyeyanê cergan ê Sûrîye ra girewte. Keyeyê Çimdarîye eşkera kerd ke Tirkîya  2400 cergî erşawitî Lîbya û 1700 cergan rê zî perwerde da. Goreyê dezgehanê medyaya welatanê Rojawanî bi hawayêkê fermîyî 80 leşkerê Tirkîya Lîbya de estê. Tirkîya zî vana ke 35 leşkerê înan Lîbya de esta.