Serekomarê Îranî Hasan Rûhanîyî derheqê teyaraya Ukrayna ya ke 8ê çeleyî de hetê artêşa Îranî ra ameye pirodayene de televîzyonêkê Îranî de eşkerayîyêke daye û vat: ''Kamê ke nê serebûtî ra berpirsîyar ê do bêrê cezakerdene. Ganî mehkemeyêke bêra ronayene ke tede dozgerê payeberzî û 12 pisporî bibê."

Rejîmê Îranî hêvî keno ke bi na eşkerayîya Rûhanî û destbendkerdişan nêrazîbîyayîşê welatî kêm bikero. Wexto ke artêşa Îranî îtîraf kerd ke înan bi şaşîyêke da teyaraya Ukrayna ro Îran de çalakîyanê protestoyî dest pêkerd û hema zî dewam kenê.

Edaletê Îranî pare kerd ke roja sêşemeyî çarçewa tehqîqatî de tay kesî ameyî destbendkerdene. Labelê hûmara nêameye eşkerakerdene û nêame parekerdene ke kamî ameyî destbendkerdene.

Sere de Kanada Îngilîztan, Ukrayna, Swêd û Afganîstan ê ke hemwelatîyê înan qezayê teyaraya Ukrayna de merdî Îranî ra waşt ke tehqîqatêkê zelalî bikero. Serekwezîrê Kanada Justîn Trudeauyî vat: "Ez pê bawer a ke edalet do bêro ca.'' Trudeauyî derheqê teyaraya Ukrayna de DYA binê tometî de verdaye. Trudeauyî kanala Globalî reyde qisey kerd û vat ke komelê mîyanneteweyî hem derheqê babeta 'Hewce yo ke Îran bênukleer bibo' de hem zî derheqê babeta kêmkerdişê alozîya ya ke hetê DYA ra herême de yena awankerdene de zaf zelal o.

Trudeauyî bale ante 57 hemwelatîyanê Kanada yê ke qeza de wefat kerd û vat: "Ez bawer a ke eke na alozî ya ke wextanê peyênan de vejîyaye meydan nêbiyêne nê kanadayîjî nika keyeyê xo de niştêne ro."