Multecî Samuel Yeboah 27 serrî verî 1991 de şaristanê Saarlouisî yê Almanya de serebûtêkê vêşnayîşî de dinyaya xo bedilnabî. Mekeme derheqê serebûtî de teşrîna verêne de do bira xo bida.

Mehkemeya Herême ya Berze ya Koblenzî 2022 de dosyaya dewa newe ra akerdbî.

19ê êlula 1991î de çend hêrişkeran benzîn eştbi merkezê cabîyayîşê multecîyan û şewat vila bibi. Şewat de Yeboahî dinyaya xo bedilnabî. Tehqîqatê serebûtî 1992 de seba ke vergumanêk çin bi amebi qefilnayene.

2007 de kesê bi nameyê Peter S. partîyêka werdî de vatbi: ''O ez bîya û ê nêeşkenê mi bitepişê.'' Naye ser o tehqîqat newe ra dest pêkerd. 

Peter S.yo ke goreyê îdîayan mîyanê rastgîranê radîkalan de cagêno û di kesê vergumanî est ê ke serebût de hetkarîya Peterî kerda.

Peter S. mehkeme de destpêk de sûcdarîyî red kerdî la dima nameyê kesêkê bînî da. 

Mehkeme do derheqê sûcdaran de bira xo teşrîna verêne de eşkera bikera. Tehqîqatê dewa seba qurbananê serebûtanê vêşnayîşî yê serranê 90an do bibo mîsal.