Dewleta tirke bi teyarayan cergî derbazê Lîbya kerdî

Dewleta tirke ya ke  wazena Lîbya de vila biba, komê cergan ê ke DAÎŞ ra mendî û Rojawan de xebitnayî bi teyarayan derbazê Lîbya kerdî.

Parlamentoyê Tirkîya menga çeleyî de seba destûrnameyê Lîbya do raydayîş biko. Seba nê raydayîşî zî vengdayîşê hukmatê Îslamî yê Lîbya sey bahane ame mojnayene.

Dewleta tirke nêrazîbîyayîşî pey goşan kerdî û leşkerê bipereyî erşawitî Lîbya. Serekkomarê Tirkîya Recep Tayyîp Erdogan hewteyê vîyarteyî de Tunus de bi. Pêvînayîşê 25ê kanûne de ame îdîakerdene ke krîzê Lîbya kewt rojdem. Goreyê keyepelê Opînîonî şewa şemeyî û yewşemeyî de zaf teyarayê sivîlî yê Tirkîya ver bi Lîbya şîyî. Yeno pawitene ke bi seyan leşkerê bipereyî ameyî erşawitene. Nê leşkerê bipereyî zî DAÎŞ û El Qaîde ra mendî û Sûrîye de zî hetê dewleta tirke ra ameyî xebitnayene.

Dezgehê Muşhade yê Heqanê Merdiman zî pare kerd ke dewleta tirke nêzdîyê 300 'şerwanê Sûrîye' erşawitê Lîbya. Goreyê modyaya komelkî nê cergî seba ke vera Halîfe Haftar şer bikê ameyî erşawitene. Dezgehî da zanayene ke kampanê perwerdeyî yê dewleta tirke de tewr tay 1000 kesî seba erşawitişê Lîbya ameyî perwerdekerdene. Bi nê armancî dewleta tirke merkezê Efrînî de merkezê qeydkerdişî akerdî ke kesê ke wazenê şorê Lîbya qeyd kenê.

Lîbya de di îdareyî estê. O yewîn hukmatê yewîya neteweyîye yo ke tede komê îslamîyî serdest ê û merkezê ci Trablus de yo, Qatar û Tirkîya zî paştî dana nê hukmatî. O diyîn zî hukmatê Halîfe Haftar o ke Misir, Rûsya û Emîrîya Ereban a Yewbîyaye paştî dana ci.