Xebere ajansê Reutersî de ameye weşanayene û goreyê Reutersî, wezîfedaranê DYA’yî no derheq de beyanat dayo wezîfedaranê Tirkîya û vato sewqîyatê techîzatê teyareyanê şerî yê F-35’î ameyo betalkerdene.

DYA’yî no qerar seba ke Tirkîya Rûsya ra sîstemê pawitişî yê hawayî yê S-400’yî herînayê girewto.

F-35’î hetê şîrketê DYA’yî yê Lockheed Martînî ra yenê viraştene û tayê parçeyê nê teyareyan Tirkîya ra yenê tedarîkkerdene.

Çimeyê DYA’yî yê ke nameyê xo nêkenê eşkera, vanê sewqîyatê teçhîzatê perwerdeyî û materyalanê F-35’î do bêrê betalkerdene û DYA do Tirkîya ra sewq nêkero.

Radyoyê Vengê Amerîkayî zî xebere Pentagon ra daye gire û rast vete. Xebere de wina ame vatene: “Tirkîya derheqê teslîmgirewtişê S-400’an de biqerar a û naye ra zî sewqîyat û fealîyetê derheqê F-35’î ameyê betalkerdene. No derheq de Tirkîya reyde dîyalogê ma dewam kenê.”

Pentagonî beyanatanê xo yê naye ra ver de vatbi: “Tirkîya ke projeyê  F-35’î ra ke bivejîyo, seba ma tengîye vejîna la ma bê alternatîf nîyê. Şîrketê bînî yê ke wazenê nê karî bikerê estê. Ma waştêne ke Tirkîya bivirazo la Tirkîya goreyê peymana yewîye tê nêgêrena û no zî problem o.”

Amerîka naye ra ver zî derheqê sewqîyatê teçhîzatê F-35’î de Tirkîya heşar kerdebî.