AFPyî xeberêka xo de îdîa kerd ke artêşa DYA fermandaranê xo yê Iraqî rê mektubêk erşawit û ferman da ke seba tepîyaancîyayîşî fermandarî xo amade bikerê. Xebere de ame vatene ke nê mektubî ser o morê Fermandarê Yewînanê Amerîka yê Iraqî William H. Seelyî esto.

Ame parekerdene ke Fermandarê Yewînanê Amerîka yê Iraqî William H. Seely o ke seba têkoşînê vera DAÎŞî Iraq de yo hurmetê bira Parlamentoyê Iraqî keno.

Esper: Xebera Mi Pê Mektubî Çin a!

Xebera mektubî medyaya komelkîye ser o cade vila bîye labelê Wezaretê Pawitişî yê DYA (Pentagon) xebera mektubî tesdîq nêkerde. Wezîr Merk Esperî îfade kerd ke xebera ey pê mektubêkê winasênî çin a û vat: "Ez nêzanena no mektub senîn o. Ma kenê ke bivînê no mektub çara vejîya." Esperî ard ziwan ke înan bire nêdaye ke Iraqî ra hêzanê xo tepîya biancê.

Dima ke Fermandarê Hêzê Qudûsî yê pabesteyê Artêşa Muxafizanê Şorişî ya Îranî Qasim Silêmanî ame kiştene Parlamentoyê Iraqî reydayîşê roja yewşemeyî de bire dabi ke hêzê Amerîka yê Iraqî welatî ra xo tepîya biancê. Labelê Serekê DYA Donald Trumpî na bire bi hawayêkî xurtî rexne kerdbi.