Forumo Komelkî yê Dinya emser  23 ra heta 31ê çeleyî bi hawayêkê onlineyî yeno kerdene. Forum de alternatîfanê dinyayêka bîne ser o yeno qiseykerdene. Her cayê dinya ra temsîlkarê partî, têgêrayîşê cinîyan, aktîvîstê ekolojî ûsn do panel de qisey bikerê.

Kurdish Network (Torra Xebate ya Kurdan), Têgêrayîşê Azadîye yê Kurdîstanî û Cinîyan zî panel de qisey bikerê û kargehan virazê.

Temsîlkara Kongreya Starî ya Ewropa Rohashe Shexo panelê 'Sey çeka şerî: Şîdetê vera cinîyan', Vervatoxa Komîsyonê Têkilîyanê Teberî yê KNKyî Nîlufere Koç panelê 'Pê dîyalog û îtîfaqan vergirewtişê şerî' de, Vervatoxa REPAKî Merale Çîçek panelê 'Femînîzm, komel û pirrengîye' de do qisey bikerê.

Têgêrayîşê Cinîyan ê Kurdan ra Melîke Yaşar kesanê sey şorişgêra filîstinije Leyla Xalîd reyde qiseykerdişê akerdişê panelî kerd.

Melîke Yaşar qiseykerdişê xo de bale ante têkoşînê cinîyan ê kurdan ê vera DAÎŞî ser û da zanayene ke dewletî seba menfaatanê xo DAÎŞ hema zî xebitnenê.

Melîke Yaşar vat: ''Ganî paştdayîş û enternasyonalîzm newe ra bêrê ercnayene. Ma nika Rojawan de wina kenê. Pê DAÎŞî ame waştene ke şorişê Kurdîstanî çin bibo. Eke dinya de cayêk de şarêk azad o la cayêkê bînî de şarêko bîn bindest o no yeno a mana ke ma azad nîyê. Eke ma alternatîfêk nêvînê ciwanî do verê xo bidê cayanê sey DAÎŞî.''

Melîke Yaşar pêşnîyazê 'Konefederasyonê Şaran' pêşkêş kerd û vat:''Sey têgêrayîşê cinîyan ê kurdan têkoşînê ma de çekî se ra 10 ca gênê. Se ra 90 ma têkoşînê hîşmendîye danê.''

Wezîrê Verênî yê Yunanîstanî û Endamê Platformê Averwazî Yanis Varoufakisî qiseykerdişê xo ra verî têkoşînê cinîyan ê kurdan rê selam kerd.