Eşref Ganîyî eşkerayîya xo de vat: ''Ma vizêr û ewro bire daye ke parekerdişêk nêkerê hewteyê bêro de mabênê 10 rojan de ma do bikerê.'' û ard ziwan ke ê do mabênê hewteyêkî de bivînê ke adirbirnayîşê mabênê Washingtonî û Talîbanî do bêro kerdene yan ney. Ganîyî na eşkerayîye Konferansê Asayîşî yê Munchenî de kerd.

Serekê DYA Donald Trumpî roja pancşemeyî eşkerayîyêke dabî û pare kerdbi ke ê ''zaf nêzdî yê'' ke Talîban reyde peymanêke bikerê.

Yeno vatene ke eke her di terefî goreyê adirbirnayîşî têbigêrê beno ke na peymane bivura ke DYA 12 heta 13 hezar leşkeranê xo yê Afganîstanî tepîya bianca.

Wezîrê Karanê Zereyî yê Afganîstanî Mesud Andarabîyî mîyanê hewteyî de bi eşkerayîyêke pare kerd ke hêzê asayîşî yê Afganîstanî amade yê ke goreyê adirbirnayîşî yan zî mercê kêmkerdişê şîdetî têbigêrê.

Serekkomar Ganîyî zî eşkerayîya xo ya Munchenî de da zanayene ke ê gumandar ê ke Talîban şîdetê xo biqedno.

Na çarçewa de adirbirnayîşo ke seba hewt rojan ame plankerdene hema nêame zelalkerdene. DYA têna vat adirbirnayîş nêzdî de do dest pêbikero.

Prosesê hîrê safhayan

DYA bi taybetî qala prosesê hîrê safhayan kena. Goreyê safhaya verêne terefgîrê qasê 7 rojan do keyeyê çimdarîye de bimanê û bi hawayêkê cîdîyî biewnê yewbînan. Talîbanî û leşkeranê Amerîka na safha ser o ke sey ''kêmkerdişê şîdetî'' pênase kenê pêkerd. Artêşa Afganîstanî zî bire daye ke operayonan kêm bikera. Yeno vatene proses 17ê sibate de do dest pêbikero.

Peymana adirbirnayîşî ya mabênê DYA û Talîbanî Konferansê Asayîşî yê Munchenî de ameye tesdîqkerdene. Eke meseleyêke nêba pêro aktorê herême peymane do îmza bikerê. Rewşêka winasêne de zî safhaya hîrêyîne dest pêbikera. Na çarçewe de zî yeno pawitene ke mabênê afganan de qasê 10 rojan dîyalogî do dest pêbikerê.