Şerîdê Gazze de dimayê numayîşanê protestoyî yê roja Îneyî ra, Îsraîlî hêrişo hewayî kerd û 4 kesan cuya xo vînî kerde. Her di hetan zî vizêr hêrişê xo domnayî. Goreyê artêşa Îsraîlî Şerîdê Gazze ra nizdê 250 roketî erzîyayê û tewr tay di kesî birîndar bîyê. Ame zanayene ke dimayê hêrişanê roketan bi des hezaran kesî ‘herêmanê ewleyan’ de bica bîyê.

Artêşa Îsraîlî bi çetinî hêriş berd serê Gazze. Mîyanê roje de û hela şanî, hêrişanê hewayîyan de tewr tay 4 Filîstînijan cuya xo vînî kerde ke înan ra yew zî doman o.

Goreyê artêşa Îsraîlî hêrişî hemverê nuqtayanê leşkerîyan ê organîzasyonê Îslamî Cîhadî û Hamasî ameyê kerdene. Labelê yeno vatene ke mîyanê kesanê ke cuya xo vînî kerda de cinîyêk û pitikê ci zî estê.

Hamasî zî da zanayene ke hêrişê roketî seba cewabê hêrişanê Îsraîlî yê roja Îneyî bîyê ke înan de tewr tay 4 Filîstînijan cuya xo vînî kerda.